Aviaqatnawlar mámlekettiń ekonomikalıq rawajlanıwı, turizm potencialı hám xalıqaralıq baylanıslardı bekkemlewde áhmiyetli orın iyeleydi. Usı jaǵınan, aviaqatnawlardıń kólemi hám aeroportlardıń jumısı mámleket rawajlanıwınıń tiykarǵı kórsetkishlerinen biri bolıp esaplanadı.
Ótken 2025-jıldıń juwmaqlarına bola, Ózbekstan aviaciya tarawı turaqlı ósiw pátlerin kórsetti hám ishki hám xalıqaralıq aviaqatnawlar boyınsha anıq qáliplesken sistemaǵa iye ekenin tastıyıqladı. Aeroportlardıń jumısı boyınsha analitikalıq maǵlıwmatlar mámlekette qaysı aymaqlar xalıqaralıq aviaqatnawlardıń áhmiyetli orayına aylanǵanı, qaysı aeroportlarda bolsa ishki reysler ústin ekenin ayqın kórsetedi.
Tashkent xalıqaralıq aeroportı mámlekettiń tiykarǵı aviaciya xabı sıpatında óz jetekshiligin saqlap qalmaqta. Esap beriw dáwirinde bul jerde jámi 79 mıń 958 reys ámelge asırılǵan bolıp, sonnan 62 mıń 549ı xalıqaralıq jónelislerge tuwra keledi.
Jolawshılar aǵımı 9 million 986 mıń 445 ti quraǵan, olardıń 86 procentten aslamı xalıqaralıq reyslerdiń úlesine tuwra keledi.
Xalıqaralıq tasıwlar kólemi boyınsha ekinshi orında Samarqand xalıqaralıq aeroportı turadı. Aeroport arqalı 12 mıń 130 reys ámelge asırılǵan bolıp, sonnan 10 mıń 415 i xalıqaralıq jónelisler bolıp esaplanadı. Jolawshılar aǵımı 1 million 521 mıń 158 ge jetken bolıp, tiykarǵı bólegin xalıqaralıq reysler quraǵan.
Úrgensh aeroportı tasıwlar strukturasınıń salıstırmalı turaqlılıǵı menen ajıralıp turadı. Bul jerde 6 mıń 546 reys ámelge asırılıp, olar derlik teń túrde ishki hám xalıqaralıq jónelisler arasında bólistirilgen. Ulıwma jolawshılar aǵımı 862 mıń 522 di quraǵan bolıp, xalıqaralıq reysler biraz ústinlik etedi.
Namangan aeroportında xalıqaralıq reysler anıq ústin. 5 mıń 755 reystiń 87 procentten aslamı xalıqaralıq jónelislerge tuwra keledi. Jolawshılar aǵımı 867 mıń 367 di qurap, sonnan 819 mıń 970 i xalıqaralıq reyslerde ushqan. Ferǵana aeroportı bolsa 5 mıń 996 reys hám 693 mıń 397 jolawshıǵa xızmet kórsetken bolıp, bul jerde de xalıqaralıq tasıwlar ústinlik etedi.
Buxara aeroportında 5 mıń 786 reys ámelge asırılıp, 574 mıń 36 jolawshı dizimge alınǵan.
Ishki reysler jedel bolıwına qaramastan, jolawshılar aǵımınıń tiykarǵı bólegi xalıqaralıq jónelislerge tuwra keledi. Termiz aeroportında bolsa tiykarınan ishki tasıwlar ámelge asırılǵan bolıp, 3 mıń 876 reys arqalı 349 mıń 227 jolawshıǵa xızmet kórsetilgen.
Nókis aeroportında da ishki jónelisler ústinlik etedi. 2 mıń 827 reys arqalı 330 mıń 707 jolawshı tasılǵan bolıp, olardıń derlik 74 procenti ishki reyslerdiń úlesine tuwra keledi. Ándijan aeroportında 808 reys ámelge asırılıp, 93 mıń 964 jolawshıǵa xızmet kórsetilgen. Bul jerde xalıqaralıq jónelislerdegi jolawshılardıń sanı ishki reyslerge qaraǵanda joqarıraq.
Qarshı aeroportında 2 mıń 138 reyste 176 mıń 331 jolawshı dizimge alınǵan. Nawayı aeroportı bolsa 49 mıń 110 jolawshıǵa xızmet kórsetken bolıp, tasıwlar quramında xalıqaralıq reysler salmaqlı úlesti saqlap qalmaqta.
Keltirilgen maǵlıwmatlar Ózbekstan aviaciya sistemasında tek ǵana paytaxt emes, al aymaqlıq aeroportlar da, ásirese turistlik hám shegara aymaqlarında, ishki hám xalıqaralıq aviaqatnawlardı rawajlandırıwda áhmiyetli orın iyeleytuǵının kórsetedi.

Muhayyo Toshqoraeva,
ÓzA