Qaraqalpaqstan Respublikası Salıq basqarmasında Salıq komiteti baslıǵınıń orınbasarı U.Sadullaevtıń qatnasıwında jeke quram menen májilis ótkerildi.
Májiliste jasırın ekonomikanı qısqartıw, rásmiy emes xızmetkerlerdiń jumısın legallastırıw boyınsha jumıslardı nátiyjeli shólkemlestiriw máseleleri dodalandı.
Dáslep shıǵıp sóylegenler mámleketimiz basshısı tárepinen usı jıldıń 27-yanvar kúni ótkerilgen videoselektor májilisinde salıq uyımlarınıń aldına jasırın ekonomikanı qısqartıw boyınsha anıq wazıypalardıń belgilep berilgenligin atap ótti.
Ushırasıw dawamında korrupciyaǵa qarsı gúresiw hám onıń aldın alıw máselesine ayrıqsha itibar qaratıldı. Korrupciya jaǵdaylarına sebep bolıp atırǵan faktorlar hám olardı saplastırıw ilajları dodalandı. Atap aytqanda, ishki miynet tártip-qaǵıydalarına ámel etpew, jumıs nátiyjeliliginiń tómenlewi hám dámegóylik sıyaqlı illetler barlıq huqıqbuzarlıqlardıń tiykarı ekeni atap ótildi.
Atap ótilgenindey, jámáátte salamat ortalıqtı qáliplestiriw hám óz-ara birgelikte islesiw belgilengen prognoz rejeniń orınlanıwın támiyinlew menen bir qatarda korrupciyalıq jaǵdaylardıń aldın alıwda ayrıqsha áhmiyetke iye.
Májiliste qánigelerdiń pikir-usınısları tıńlanıp, wazıypalar kelisip alındı.

Á.Jiyemuratov,
Qaraqalpaqstan xabar agentligi