Qaraqalpaqstan Respublikası Hákimshilik sudı menen birgelikte Qaraqalpaqstan Respublikası Prokuraturasında videokonferencbaylanıs rejiminde shólkemlestirilgen náwbettegi oqıw-seminarı hákimshilik sudlarda kommunallıq xızmetler – gaz támiynatı, elektr energiyası hám ishimlik suwı tarawında júzege kelip atırǵan dawlı tartıslardı kórip shıǵıw ámeliyatına baǵıshlandı.
Qaraqalpaqstan Respublikası Hákimshilik sudınıń sudyaları G.Baynazarova hám A.Imatovlar tarawda ushırasıp atırǵan mashqalalar, ásirese, esap-sanaqlardıń durıslıǵın anıqlaw, qayta esaplaw máseleleri, shártnamalıq qatnasıqlardan kelip shıǵatuǵın dawlı tartıslar, támiynattı nızamsız úzip qoyıw jaǵdayları hám tutınıwshılardıń huqıqların támiyinlew menen baylanıslı jaǵdaylardı hár tárepleme dodaladı.
Bul baǵdardaǵı dawlı máseleler sanınıń artıp baratırǵanı tarawda sistemalı analizlewdi talap etpekte. Atap aytqanda, xızmet kórsetiwshi shólkemlerdiń qarar hám háreketleriniń nızamlılıǵına huqıqıy baha beriw, tutınıwshılarǵa jetkerilgen zıyandı anıqlaw hám ádil sheshiw, esaplaw úskeneleriniń jaǵdayı hám dálillerdiń isenimliligin tekseriw, nızamshılıqta belgilengen tártip-qaǵıydalarǵa ámel etilgenin úyreniw sıyaqlı máseleler ayrıqsha áhmiyetke iye.
Seminar dawamında sud ámeliyatında ushırasıp atırǵan túrli talqılawlar hám tartıslı jaǵdaylar boyınsha óz-ara pikirlesip, birden-bir huqıqtı qollanıw ámeliyatın qáliplestiriw zárúrligi atap ótildi. Óytkeni, kommunallıq xızmetler xalqımız turmısınıń ajıralmas bólegi hám sociallıq turaqlılıqtıń tiykarǵı faktorlarınan biri ekenin esapqa alǵan halda, bul baǵdardaǵı nızamlılıqtı támiyinlewde prokuratura uyımları da ayrıqsha orın iyeleydi.
Ilaj juwmaǵında qatnasıwshılar tárepinen bir qatar ámeliy usınıslar islep shıǵıldı.

Qaraqalpaqstan xabar agentligi