Sońǵı jılları Aralboyı aymaǵında júzege kelgen ekologiyalıq mashqalalardı ilimiy tiykarda sheshiw, shólleniw processlerin toqtatıw hám aymaqtıń tábiyǵıy turaqlılıǵın tiklew maqsetinde keń kólemli ilimiy-ámeliy tájiriybe jumısları alıp barılmaqta.
Usınday ilajlardıń biri Ózbekstan Respublikası Ilimler akademiyası Qaraqalpaqstan bólimi, Berdaq atındaǵı Qaraqalpaq mámleketlik universiteti, Ájiniyaz atındaǵı Nókis mámleketlik pedagogikalıq institutı, Nókis innovaciyalıq texnologiyalar institutı hám Tashkent ximiya-texnologiya institutınıń ilimpazları hám izertlewshileri tárepinen shólkemlestirildi.
Ilimiy ekspediciya Aral teńiziniń qurıǵan ultanında alıp barılıp, tiykarǵı itibar shól sharayatına sáykes, shorlanıw hám qurǵaqshılıqqa shıdamlı nál túrlerin egiw hám olardıń beyimlesiwsheńligin úyreniwge qaratıldı. Kópshilikke málim bolǵanınday, Aral teńiziniń qurıwı nátiyjesinde payda bolǵan jańa shól aymaǵı tek ǵana Qaraqalpaqstan emes, al pútkil Oraylıq Aziyanıń ekologiyalıq turaqlılıǵına ayrıqsha tásir etpekte. Sonlıqtan bul aymaqtı kóklemzarlastırıw hám biologiyalıq rekultivaciyalaw búgingi kúnniń áhmiyetli wazıypalarınan biri bolıp esaplanadı.
Usı ilimiy-ámeliy ilajda Ilimler akademiyası Qaraqalpaqstan bólimi baslıǵı, akademik A.Reymov hám Tashkent ximiya-texnologiya institutı professorı A.Erkaev – jas ilimpazlar menen jaqınnan pikirlesti. Olar dala sharayatında izertlew metodologiyası, topıraq analiziniń zamanagóy usılları, shól aymaqlarında nál jetistiriw texnologiyaları jáne ekologiyalıq monitoring máseleleri boyınsha óz tájiriybeleri menen ortaqlastı.
Jas izertlewshiler ushın bul process tek teoriyalıq bilimlerdi bekkemlew emes, al ámeliy kónlikpelerdi qáliplestiriw kózqarasınan da áhmiyetli mektep wazıypasın atqaradı. Ilimiy ekspediciya dawamında jas ilimpazlar topıraqtan úlgi alıw, dala baqlawların júrgiziw, laboratoriyalıq analizler ushın dáslepki tayarlıq processlerinde belsene qatnastı. Bul baslama ilim, bilimlendiriw hám ámeliyat integraciyasınıń ayqın úlgisi bolıp, Aralboyı aymaǵınıń ekologiyalıq turaqlılıǵın támiyinlew jolında áhmiyetli qádem bolıp xızmet etedi.

Qaraqalpaqstan xabar agentligi