Senattıń Agrar, suw xojalıǵı máseleleri hám ekologiya komitetiniń májilisinde ayırım nızam hújjetlerine qosımshalar hám ózgerisler kirgiziwge baylanıslı nızamlar dáslepki tárizde dodalandı.
Jáhán sawda shólkeminiń Sanitariyalıq hám fitosanitariyalıq ilajlardı qollanıw boyınsha kelisim talaplarınan kelip shıqqan halda fitosanitariyalıq ilajlar boyınsha nızamshılıq xalıqaralıq standartlarǵa muwapıqlastırılmaqta.
Atap aytqanda, “Ósimlikler karantini haqqında”ǵı nızamǵa fitosanitariyalıq qáwip-qáterdi tallawǵa baylanıslı jańa norma kirgizilip, fitosanitariyalıq qáwip-qáterdi tallaw Ósimlikler karantini hám onı qorǵaw agentligi tárepinen ámelge asırılatuǵını hám onıń tártibi Ministrler Kabineti tárepinen tastıyıqlanatuǵını belgilenbekte.
Yuridikalıq táreplerge fitosanitariyalıq zıyansızlandırıw boyınsha jumıs ushın sheklengen múddetke licenziya beriliwi hám bul jumıstı licenziyalaǵanı ushın mámleketlik bajı belgilenedi. Licenziyanıń ataması hám onıń kishi túrleri anıqlastırılıwı hám bul jumıstı ámelge asırıw waqtında júz bergen huqıqbuzarlıqlar ushın járiymalar muǵdarınıń belgileniwin názerde tutatuǵın normalar kirgizilmekte.
Nızam ósimlikler karantini hám onı qorǵaw tarawın xalıqaralıq standartlarǵa beyimlestiriw, huqıqbuzarlıqlardıń aldın alıw hám isbilermenler ushın qolaylı sharayatlar jaratıwǵa xızmet etetuǵını atap ótildi.
“Ekologiya, qorshaǵan ortalıqtı qorǵaw hám tábiyattan paydalanıw tarawındaǵı huqıqbuzarlıqlardı islegenlik ushın juwapkershilik kúsheytiliwi múnásibeti menen Ózbekstan Respublikasınıń ayırım nızam hújjetlerine qosımshalar hám ózgerisler kirgiziw haqqında”ǵı nızam menen ekologiya, qorshaǵan ortalıqtı qorǵaw hám tábiyattan paydalanıw tarawındaǵı huqıqbuzarlıqlar ushın finanslıq sankciyalar engiziliwin názerde tutatuǵın ózgerisler hám qosımshalar kirgizilmekte.
Nızamda ekologiyalıq jaǵdaydı qadaǵalaw, xalıqtıń salamatlıǵın jaqsılaw, tábiyǵıy resurslardı únemlew hám olardan aqılǵa uǵras paydalanıw, ekologiyalıq turaqlılıqtı támiyinlew menen bir qatarda mámleketlik ekologiyalıq qadaǵalaw sistemasın jetilistiriw hám bul tarawdaǵı huqıqbuzarlıqlardıń aldın alıw ilajları názerde tutılǵan.
Májilis juwmaǵında kórip shıǵılǵan máseleler boyınsha tiyisli qararlar qabıl etildi.
Bunnan tısqarı, xalıq deputatları jergilikli keńesleriniń agrar, suw xojalıǵı hám ekologiya máseleleri boyınsha turaqlı komissiyalarınıń aǵzaları ushın aymaqlarda ekologiyalıq jaǵdaydı jaqsılaw, ekologiyalıq mashqalalardı sheshiw baǵdarında jergilikli keńesler aldında turǵan áhmiyetli máseleler boyınsha oqıw seminarı ótkerildi.
Seminarda turaqlı komissiya aǵzalarınıń tarawǵa baylanıslı nızamshılıqtaǵı jańalıqlar, ózgerisler boyınsha bilim hám kónlikpelerin arttırıp barıw, tarawǵa baylanıslı nızamlardı kórip shıǵıwda olardıń pikirin esapqa alıw zárúr ekenligi aytıp ótildi hám tiyisli wazıypalar belgilendi.

Norgul ABDURAIMOVA,
WzA muxbiri