Sońǵı jılları jaslardıń sırt el bilimlendiriwine qızıǵıwshılıǵı joqarı dárejede saqlanıp qalmaqta.
Biraq, 2025-jıldıń juwmaqlarına bola, sırt elde bilim alıwdı tańlaǵan ózbekstanlılardıń sanı belgili dárejede azayǵan. Milliy statistika komiteti járiyalaǵan sanlar bul baǵdardaǵı jaǵday qanday ekenin ayqın kórsetpekte.
2025-jıl dawamında 28 mıń 954 Ózbekstan puqarası oqıw maqsetinde sırt elge barǵan. Bul kórsetkish 2024-jılǵa salıstırǵanda 6,9 mıńǵa yamasa 19,3 procentke azayǵanı atap ótildi.
Tallawlarǵa bola, ózbekstanlı jaslar bilim alıw ushın eń kóp Rossiyanı tańlaǵan – bul mámleketke 6 mıń 498 student barǵan. Keyingi orınlarda Tájikstan (6 039 adam) hám Qırǵız Respublikası (4 648 adam) dizimge alınǵan.
Sonday-aq, Qubla Koreyaǵa 3 mıń 513, Túrkiyaǵa 2 mıń 496, Qıtayǵa 1 mıń 259, Qazaqstanǵa 1 mıń 97 student barǵan.
Evropa hám Amerika mámleketleri arasında bolsa Ullı Britaniya (886 adam), Germaniya (391 adam) hám AQSh (351 adam) ózbekstanlı studentler eń kóp barǵan mámleketler sıpatında atap ótildi.
Maǵlıwmatlarǵa qaraǵanda, 2025-jılı ózbekstanlılar bilim alıw maqsetinde jámi 35 sırt mámleketke barǵan.

Hamroz Bayanov, ÓzA