Búgin Ózbekstan Kórkem óner akademiyası Qaraqalpaqstan bólimi Kórgizbe sarayında «Qaraqalpaqstan: keshe hám búgin» atamasındaǵı fotokórgizbe hám fototańlaw jeńimpazların sıylıqlaw máresimi bolıp ótti.
Ilaj Qaraqalpaqstan Respublikası Mádeniyat ministrligi, Respublikalıq Ruwxıy-aǵartıwshılıq orayı Qaraqalpaqstan bólimi hám Ózbekstan Kórkem óner akademiyası Qaraqalpaqstan bólimi tárepinen birgelikte shólkemlestirildi.
Fototańlawdıń tiykarǵı maqseti — Qaraqalpaqstanda ámelge asırılıp atırǵan reformalardı, infrastrukturalıq ózgerislerdi, jaslar baslamaların hám mámlekettiń jańa kelbetin foto súwretler arqalı jámiyetshilikke jetkeriw. Sonday-aq, jas talantlardı qollap-quwatlaw hám fotografiya ónerine bolǵan qızıǵıwshılıqtı arttırıw bolıp esaplanadı.
Tańlaw eki basqıshta ótkerildi. Birinshi basqıshta dekabr ayında járiyalanǵan tańlawdan soń, yanvar ayınıń 27-sánesine shekem fotograflardıń dóretiwshilik jumısları qabıllandı. Ekinshi basqıshta tóreshiler tárepinen eń jaqsı dep tabılǵan jumıslardan ibarat fotokórgizbe shólkemlestirildi.
Tańlawǵa 10 ǵa jaqın fotosúwretshiler qatnasıp, olardıń jumısları tóreshiler tárepinen bahalandı. Nátiyjede eń jaqsı dep tabılǵan súwretler kórgizbege usınılıp, jeńimpazlar anıqlandı.
Ótkerilgen kórgizbede jumısları joqarı bahalanǵan 5 avtordıń Qaraqalpaqstannıń búgingi rawajlanıwın, jaslardıń belsendiligin, infrastrukturalıq ózgerislerdi hám elimizdiń jańa kelbetin sáwlelendirgen 80 nen aslam fotosúwretleri orın aldı hám tańlaw juwmaqları boyınsha birinshi orındı Maxset Hábibullaev, ekinshi orındı Islam Matekov, úshinshi orındı Maxmud Shamuratovlar iyeledi.
Sonday-aq, belsendiligi menen kózge taslanǵan háwesker fotograflar Shaxzada Xojambergenova hám Ikram Muratbaevlar sertifikat hám estelik sawǵaları menen sıylıqlandı.
Bunday ilajlardıń ótkeriliwi xalqımızdıń fotografiya ónerine bolǵan qızıǵıwshılıǵın arttırıwǵa, jas dóretiwshilerdi qollap-quwatlawǵa hám Qaraqalpaqstannıń búgingi kelbetin keń jámiyetshilikke tanıtıwǵa xızmet etedi.

Qaraqalpaqstan xabar agentligi