Qaraqalpaqstan Respublikası Qurılıs hám turaq jay kommunal xojalıǵı ministrliginiń baslaması menen press-tur shólkemlestirilip, onda ǵalaba xabar qurallarınıń wákillerine Nókis qalasındaǵı bir qatar iri qurılıs obektleri hám infrastruktura joybarları tanıstırıldı.

Press-tur tórt baǵdar boyınsha ótkerildi. Dáslep “Náwpir” mákan puqaralar jıyını aymaǵındaǵı 285 kvartiralı 3 kóp qabatlı turaq jaylardıń qurılıs jumısları kózden ótkerilip, process haqqında ǴXQ wákillerine hár tárepleme maǵlıwmat berildi.

– Jámiyetimiz tárepinen jańa qurılıs, rekonstrukciya hám iri ońlaw jumısları alıp barılıp atırǵan hár bir obekt boyınsha óz aldına texnikalıq qadaǵalawshı xızmetkerler biriktirilgen bolıp, obektlerde jumıslardıń joybarlaw-smeta hújjetleri tiykarında hám sapalı orınlanıwı ústinen turaqlı qadaǵalaw ornatılǵan. Kúnine 90 qurılısshı-xızmetkerimiz kúndi kún, túndi tún demey miynet etpekte. Sonday-aq, 10 texnika jumısshılarımızdıń miynetin jeńilletiw ushın tayar, – deydi “Fayz magnat” juwapkershiligi sheklengen jámiyetiniń prorabı Batırbay Seydabullaev. – Obektlerdiń belgilengen múddetlerde paydalanıwǵa tapsırılıwı támiyinlep barıladı. Nátiyjede 150 shańaraq turaq jayǵa iye boladı. Maydanı 47 hám 53 kvadrat metrli ıqsham kvartiralarımız tiykarınan eki bólmeli bolıp, olar oraylasqan ısıtıw sisteması arqalı ısıtıladı.

Keyingi mánzil “Kók ózek” mákan puqaralar jıyını aymaǵında jaylasqan oraylasqan ısıtıw sisteması boldı. Press-tur dawamında ısıtıw sistemasınıń texnikalıq jaǵdayı, ıssılıq támiynatı dárejesi, ıssı suw menen támiyinlew máseleleri jáne xalıqqa úzliksiz hám sapalı ıssılıq jetkerip beriw boyınsha ámelge asırılıp atırǵan jumıslar kózden ótkerildi.

– 2025-jıl noyabr ayında iske qosılǵan bul joybar Ózbekstan Respublikası Prezidentiniń 2024-jıl 24-dekabrdegi “2025-2027-jıllarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında”ǵı qararına tiykarlanıp ámelge asırılǵan. Joybar nátiyjesinde Nókis qalası “Kók ózek” máhállesi aymaǵındaǵı 25 kóp kvartiralı turaq jay hám 2 sociallıq taraw obekti zamanagóy ısıtıw qazanxanası ornatılıp, oraylasqan ısıtıw sisteması menen támiyinlendi. Bahası 14 milliard 852 million sumnan aslam bolǵan obekttegi ulıwma quwatlılıǵı 12 mVt bolǵan qazanxanada 3 qazan hám jer astınan ótken 3,5 kilometr uzınlıqtaǵı ıssılıq tarmaǵınan ibarat. Olar tábiyǵıy gaz, sonday-aq, gaz bolmaǵanda suyıltılǵan janılǵı menen isleytuǵın arnawlı qazan járdeminde ısıtıladı, – deydi “Kommunallıq ıssılıq támiynatı” juwapkershiligi sheklengen jámiyetiniń bas injeneri Aymurza Eshmuratov. – Bunday oraylasqan ısıtıw sisteması yaǵnıy qazanxanalardıń búgingi kúnde tórtewi Nókis qalasında, besewi Ámiwdárya, Ellikqala, Qanlıkól, Kegeyli hám Qaraózek rayonlarında jumıs alıp barmaqta. Ulıwma quwatlılıǵı 48, 3 Gkal/saat bolǵan 24 qazan hám uzınlıǵı 19,1 kilometr bolǵan ıssılıq tarmaqları bar. Sistema járdeminde 69 kóp qabatlı turaq jay (1 mıń 298 kvartira) hám 29 kótere tutınıwshılar ıssılıq energiyası menen támiyinlenip kelinbekte.

Jurnalistler obekt penen tanısıw procesinde gúzgi-qısqı máwsimde xalıq ushın qolaylı hám turaqlı ıssılıq támiynatın támiyinlew boyınsha qızıqtırǵan sorawlarına qánigeden juwap aldı.

Press-tur qatnasıwshılarınıń gezektegi mánzili Nókis qalası “Turan” mákan puqaralar jıyınındaǵı Turan stadionı boldı. Bul mánzildegi tanısıw stadionda ámelge asırılıp atırǵan rekonstrukciya jumısları hám aldaǵı rejelerge qaratıldı. Ulıwma bahası 101 milliard 846 million sum bolǵan joybardıń nátiyjesinde Turan stadionı 12 mıń tamashagóyge mólsherlengen, xalıqaralıq standartlarǵa sáykes, zamanagóy infrastrukturaǵa iye sport kompleksine aylandırılmaqta. Búgingi kúnde “Nasaf mega stroy” juwapkershiligi sheklengen jámiyeti tárepinen 59,5 milliard sumlıq qurılıs jumısları ámelge asırıldı.

Ilaj qatnasıwshıları Respublikalıq qánigelestirilgen onkologiya hám medicinalıq radiologiya ilimiy-ámeliy medicina orayı Qaraqalpaqstan filialında bolıp, filial imaratın jańadan qurıw joybarı menen tanıstı. Bul jerde 45,2 milliard sumlıq qurılıs jumısları ámelge asırılıwı rejelestirilgen bolıp, búgingi kúnge kelip, “Topıraqqala arnawlı qurılıs” JShJ tárepinen 27,2 milliard sumlıq jumıslar orınlanǵan.

Press-tur qatnasıwshıları Nókis qalasında ámelge asırılıp atırǵan bir qatar úlken dóretiwshilik jumısları, xalıqtıń turmısınan razı bolıp jasawı ushın jaratılıp atırǵan sharayatlar haqqında maǵlıwmat aldı. Jónelisler boyınsha belgilengen obektler haqqında jeterli túsinikke iye boldı.

M.Pirnazarova,

Qaraqalpaqstan xabar agentligi sholıwshısı.

M.Habibullaevtıń túsirgen súwretleri