Ózbekstan Respublikası Prezidenti Administraciyası janındaǵı Ǵalaba xabar quralları ushın kontent tayarlaw orayı hám YuNESKO menen birgelikte shólkemlestirilgen oqıw seminarlarınıń gezektegi basqıshı Qaraqalpaqstan Respublikasında bolıp ótpekte.
Bul seminarǵa Qaraqalpaqstan Respublikasınıń barlıq qala hám rayon hákimlikleri, sonday-aq, mámleketlik uyımlar hám shólkemlerdiń málimleme xızmetleriniń basshıları qatnaspaqta.
Seminarda xalıqaralıq dárejedegi media ekspertler – Joan Barata hám Sergey Shturxesskiy tárepinen mámleketlik uyımlardıń jámiyetshilik penen islesiw sistemasın xalıqaralıq talaplar tiykarında jetilistiriw boyınsha bayanatlar oqılmaqta.
Sonday-aq, oqıw kurslarında aymaqlıq baspasóz xatkerleri ushın waqıya-hádiyselerdi operativ tallaw, xalıqqa anıq hám tiykarlanǵan maǵlıwmatlardı jetkeriwdiń ámeliy tárepleri dodalanbaqta.
Seminarlarda mámleketlik basqarıw uyımları jumısınıń ashıq-aydınlıǵın támiyinlew, puqaralardıń málimleme alıw huqıqların ámelge asırıwda málimleme xızmetleriniń rolin arttırıw máselelerine ayrıqsha itibar qaratılmaqta.
Jergilikli hákimlikler hám shólkemlerdiń media mákandaǵı belsendiligin arttırıw, ǴXQ hám blogerler menen nátiyjeli birge islesiw ornatıw boyınsha óz-ara tájiriybe almasılmaqta.
Seminar dawamında qatnasıwshılar tek ǵana teoriyalıq bilimlerdi alıp qoymastan, al aymaqtaǵı málimleme siyasatın júrgiziwde júzege kelip atırǵan áhmiyetli máselelerdi xalıqaralıq ekspertler menen tikkeley talqılamaqta.
Bunday oqıw shınıǵıwları aymaqlıq málimleme xızmetleri xızmetkerleriniń mamanlıǵın arttırıw, olardıń jumısında jańasha qatnaslardı engiziw hám mámleketlik uyımlardıń xalıq penen qarım-qatnasın sapa jaǵınan jańa basqıshqa kóteriwge xızmet etedi.
Maǵlıwmat ushın: oqıw seminarları Qarshı hám Termiz qalalarında dawam etedi.

Qaraqalpaqstan xabar agentligi