Shomanay rayonında jaylasqan “Bozjap” nasos stanciyasında Qaraqalpaqstan Respublikası Suw xojalıǵı ministrligi juwapkerleriniń qatnasıwında Húkimet qararları hám baǵdarlamalarında belgilengen reje-kórsetkishlerdiń orınlanıwı hám keleshektegi rejelerdi belgilep alıw boyınsha ámeliy seminar bolıp ótti.
Seminarǵa “Suw xojalıǵı qadaǵalawı” inspekciyası baslıǵınıń orınbasarı Z.Irisbaev, Suw xojalıǵı ministriniń orınbasarı T.Madireymov, sonday-aq, nasos stanciyasınıń baslıqları hám jumısshı xızmetkerler qatnastı.
Ilajda Qaraqalpaqstan nasos stanciyaları hám energetika basqarmasınıń baslıǵı N.Aralbaev shıǵıp sóylep, nasos stanciyalarında alıp barılǵan jumıslar, yaǵnıy, nasos stanciyasına ajıratılǵan elektr energiyasın únemlew, elektr dvigatellerdi turaqlı qadaǵalaw hám jańa zamanagóy energiya únemlewshi qurılmalardı ornatıw jáne nasos agregatların óz waqtında ońlaw hám ámelge asırılıp atırǵan jumıslar boyınsha maǵlıwmat berdi.
Atap ótilgenindey, basqarma qaramaǵında 221 nasos stanciyası hám 481 nasos agregatları bar. Sonnan Shomanay rayonında 11 nasos stanciyası hám 23 nasos agregatları bolıp, 4288 gektarlıq egislik jerlerge 2025-jılı 83.424 mln.m3 suw shıǵarılıp, 3,711 mln kVt. saat elektr energiyası jumsaldı.
2025-2026-jılǵı gúzgi-qısqı máwsimde 5 nasos agregatın ońlaw rejelestirilgen bolıp, sonnan 5 nasos agregatı tolıq ońlanıp shor juwıw máwsimine tayar jaǵdayǵa keltirilgen. Sonday-aq, rayonda 17 dana K500-7 markalı nasos agregatın ornatıw rejelestirilip, ámelde segizi ornatıldı.
Seminar sheńberinde juwapkerler nasos stanciyalarında ámelge asırılǵan jumıslardı ornına shıqqan halda úyrenip, juwapkerlerge tiyisli tapsırmalar berildi.

Á.Jiyemuratov,
Qaraqalpaqstan xabar agentligi.