Jol infrastrukturası mámleket ekonomikası hám transport sistemasında áhmiyetli orın iyeleydi. Sonlıqtan, jol qurılısı, ońlaw hám texnikalıq standartlardı jetilistiriwde xalıqaralıq birge islesiw nátiyjeli esaplanadı. Sırt ellerdiń tájiriybesi, zamanagóy texnologiyalar hám ilimiy qollanbalardı Ózbekstanda engiziw arqalı jol infrastrukturasınıń qáwipsiz hám turaqlı rawajlanıwı támiyinlenedi.

Túrkiya avtomobil jolları Bas basqarması (Karayolları Genel Müdürlüğü – KGM) baslıǵı Ahmad Gulshan basshılıǵındaǵı delegaciya wákilleri Ózbekstanǵa keldi. Avtomobil jolları komitetinde delegaciya aǵzalarınıń qatnasıwında birge islesiw boyınsha sóylesiwler alıp barıldı.

Sóylesiw dawamında Avtomobil jolları komitetiniń baslıǵı J.Tursunov hám komitet baslıǵınıń orınbasarı A.Abdurahmonov mámleketimizdegi avtomobil jolları, olardıń klassifikaciyası, transkoridorlar, logistikalıq lokalizaciyalar, bar texnikalar, jol hám kópirlerdi qurıw, ońlaw hám saqlaw jumısları boyınsha maǵlıwmat berdi.

Sonday-aq, ońlaw hám qurılıs processlerin ámelge asırıw múddetleri, obektti ekspertizadan ótkeriw tártibi hám barlıq processlerdi alıp barıwda júzege kelgen mashqalalar boyınsha da pikir alısıldı.

Miymanlar Avtomobil jollarınıń texnikalıq jaǵdayın tallaw hám háreket qáwipsizligi orayında da boldı.
Tiykarǵı jumıs baǵdarı avtomobil jollarınıń texnikalıq jaǵdayın tallaw, bahalaw hám sanlastırıw, paydalanıwdı shólkemlestiriw, háreket qáwipsizligin támiyinlew hám texnikalıq shártler beriw, úlken kólemli hám awır salmaqlı transport qurallarınıń háreketleniwi ushın ruqsatnama beriw, salmaq hám kólem parametrlerin qadaǵalaw, mámleketlik kadastr hám jol aktivlerin júrgiziwden ibarat bolǵan bul Oray 2023-jıldan berli jumıs alıp barmaqta.

Ushırasıwda miymanlarǵa avtomobil jollarında háreketlenip atırǵan awır salmaqlı hám úlken kólemli avtotransport qurallarınıń salmaǵın ólsheytuǵın kóshpeli hám stacionar tárezilerdiń jumısı, sanlastırıw hám zamanagóy diagnostika texnikalarınıń funkciyasına baylanıslı maǵlıwmatlar usınıldı.

Muhayyo Toshqoraeva, ÓzAnıń xabarshısı