Mámleketimizde densawlıqtı saqlaw sistemasın reformalaw, xalıqqa zamanagóy hám sapalı medicinalıq xızmet kórsetiwdi támiyinlew boyınsha bir qatar jumıslar ámelge asırılmaqta. Ásirese, xalıqtıń salamatlıǵın bekkemlew, medicina mákemelerin qáwipsiz hám sapalı dári-dármaqlar, medicinalıq buyımlar menen támiyinlew, tarawǵa sanlastırıwdı engiziw boyınsha alıp barılıp atırǵan ilajlar óziniń unamlı nátiyjesin bermekte.
Qaraqalpaqstan Respublikası Densawlıqtı saqlaw ministrligi málimleme xızmeti tárepinen Nókis rayonı medicina birlespesine ǵalaba xabar quralları wákilleriniń qatnasıwında press- tur shólkemlestirildi.
Ilaj qatnasıwshıları 2021-jılı jańadan qurıp pitkerilip, búgingi kúnde xalıqqa sapalı hám zaman talapları tiykarında medicinalıq xızmet kórsetip kiyatırǵan medicina birlespesi imaratındaǵı jaǵdaylar menen tanıstı.
Nɵkis rayon xalqına medicinalıq járdem kɵrsetiw ushın búgingi kúnde ambulator xızmet ushın 1 kɵp tarmaqlı oraylıq poliklinika, 2 shańaraq poliklinikaları, 4 shańaraq shıpakerlik punktleri hám stacionar járdem kórsetiw ushın 142 orınǵa iye 1 oraylıq emlewxana xızmet kórsetip kelmekte. Emlew profilaktika mákemelerinde 105 shıpaker hám 399 orta buwın xızmetkerleri rayon xalqına medicinalıq xızmet kórsetip kelmekte.
Ilaj dawamında press-konferenciya shólkemlestirilip, onda rayonlıq medicina birlespesi baslıǵı Aybek Tajimuratov ǵalaba xabar quralları wákillerine alıp barılıp atırǵan jumıslar hám jaratılǵan imkaniyatlar boyınsha maǵlıwmatlar berdi.
Ilajda atap ótiwilinshe emlewxanada zamanagɵy sharayatlar jaratlıwı menen birge medicinalıq ásbap-úskeneler, yaǵnıy narkoz, UZI, rentgen apparat, laboratoriyalıq bioximiyalıq analizator, mikroskoplar menen támiyinlengen. Prezidentimizdiń tapsırması tiykarında rayondı sociallıq-ekonomikalıq jaqtan rawajlandırıw ushın biriktirilgen Samarqand wálayatı tárepinen medicina tarawına 1 mlrd 100 mln. sum qarjı berilip, bul qarjıǵa ambulator medicinalıq xızmet tarawınıń jumısların jaqsılaw maqsetinde shanaraq poliklinikalarına 3 sanitariyalıq avtomashina alıp berildi. Rayondaǵı sociallıq járdemge mútáj turǵınlarınan “Temir dápter”, “Hayal-qızlar dápteri”ne kirgizilgen puqaralardıń ishinen quramalı qániygelestirilgen operaciyaǵa mútáj nawqaslardan 19 nawqasqa Samarqand wálayatınan kelgen shıpakerler tárepinen operaciyalar biypul islengen.
Sonday-aq, shıpakerlerdiń bilimlerin jetilistiriw hám tájiriybe almasıw maqsetinde Tashkent qalasına hám sırt mámleketlerge barıp kelmekte. Usı tiykarında tájiriybeli hám óz qánigeliginiń jetik shıpakerleri rayon xalqına medicinalıq xızmet kórsetip kelmekte. Rayon medicina birlespesin sanlastırıwǵa ótkeriw barısında bir qansha jumıslar alıp barılmaqta. Atap aytqanda, 2025-jıl dawamında 99 dana kompyuter, 55 dana planshet, 16 dana smart televizor, 4 dana printer, 9 dana chek printer, 12 dana modem rotor, 5 dana Veb-kamera, 29 dana termoprinter, 36 dana 2D skaner, 4 dana INFOKIOSKler menen támiyinlendi. DMED programması arqalı nawqaslar ózleriniń barlıq medicinalıq analizleri, shıpaker náwbetshiligi haqqında maǵlıwmatlarǵa iye bolıp otıratuǵın boldı. Nátiyjede qaǵazpazlıqtan qutılıwǵa tiykar jaratıldı.
Rayon medicina birlespesine qaraslı kɵp tarmaqlı oraylıq poliklinikada “Salamatlıq”, “Fitnes” hám “Salamat awqatlanıw” xanaları shɵlkemlestirilgen.
Emlewxana ushın Ózbekstan Respublikasınıń Yaponiyadaǵı elshixanası arqalı Yaponiya mámleketinen 65000 dollarlıq kóshirmeli portativ rentgen apparatı grant tiykarında jaqında alıp kelip ornatılıw rejelestirilmekte.
-Terapiya bóliminde emlenip atırman. Bul jerde jaratılǵan shárayatlar júdá jaqsı. Shıpakerler, miyribiykeler, fizioterapiya bólimindegi xızmetkerlerge alǵısım sheksiz. Barlıq apparaturalar taza, xanalarımız jıllı. Xalqımızǵa usınday imkaniyatlar jaratıp berip qoyǵan Jurtbasshımızǵa raxmet,-deydi biz benen sáwbette bolǵan nuraniy apa Sh. Mırzabaeva.
Haqıyqatında da, emlewxananıń burınǵı imaratında sharayatlar júdá ashınarlı jaǵdayǵa kelip qalǵan edi. Kórip gúwası bolǵanımızday, barlıq bólimler azada, jıllı, apparaturalar taza. Ásirese, tuwıw bóliminde xanalardıń azadalıǵı, jıllı hám zamanagóy sharayatlardıń jaratılǵanlıǵı itibarımızdı tarttı. Bul shárayatlar álbette elimizde Ana hám bala salamatlıǵın saqlaw jolında islenip atırǵan reformalardıń ayqın dálili esaplanadı.
-Kórip gúwası bolǵanımızday, bul jerdegi jaratılǵan sharayatlar júdá jaqsı. Sanlastırıw boyınsha alıp barılǵan jumıs nátiyjeliligin hár bir bólimde kórip gúwası boldıq. Zamanagóy apparaturalar shıpakerlerdiń diagnoz qoyıw hám emlew islerinde jaqsı nátiyje bereri sózsiz. Press-turda biz rayonlıq medicina birlespesinde alıp barılıp atırǵan jumıslardıń jaqsı jolǵa qoyılǵanlıǵınıń gúwası boldıq,-deydi “Erkin Qaraqalpaqstan” gazetasınıń arnawlı xabarshısı Gúlnara Júginisova.
Ilaj sońında ǵalaba xabar quralları wákilleri tárepinen berilgen sorawlarǵa qánigeler tárepinen tiyisli juwap berildi.

Gúlnara Turdıshova, Qaraqalpaqstan xabar agentligi