Ózbekstan Respublikası Investiciyalar, sanaat hám sawda ministri Laziz Qudratov Aziya infrastrukturalıq investiciyalar banki (AIIB) prezidenti Czou Czyai menen birinshi rásmiy ushırasıwın ótkerdi.
Ministrlik basshısı bul kóp tárepleme qarjı institutınıń basshısın lawazımǵa kiriskeni menen qutlıqlap, onıń prezident sıpatındaǵı dáslepki saparı mine usı Oraylıq Aziyaǵa ámelge asırılǵanı rámziy mánige iye ekenin atap ótti.
Sóylesiwler dawamında Ózbekstan usı Banktiń regiondaǵı eń iri sherigi bolıp qalıp atırǵanına ayrıqsha itibar qaratıldı.
Bank tárepinen Oraylıq Aziyada ámelge asırılıp atırǵan barlıq operaciyalardıń 51 procenti elimizdiń úlesine tuwra keledi. Operaciyalar kólemi boyınsha Ózbekstan global reytingde Bankke aǵza mámleketler arasında altınshı orındı iyeleydi.
Birgeliktegi joybarlar portfeli 7 milliard dollardan arttı. 2024-jılı Samarqandta Aziya infrastrukturalıq investiciyalar banki Basqarıwshılar keńesiniń toǵızınshı májilisi bolıp ótkeni de strategiyalıq birge islesiwdi rawajlandırıwda áhmiyetli basqısh boldı.
Tárepler 2030-jılǵa shekemgi óz-ara birge islesiwdiń tiykarǵı baǵdarların dodaladı. Suveren emes qarjılandırıw kólemin keńeytiw, mámleketlik-jeke menshik sheriklikti qollap-quwatlaw, jasıl energetikanı rawajlandırıw hám “Kámbaǵallıqtan abadanlıqqa qaray” baǵdarlamasın ámelge asırıw máseleleri solardıń qatarına kiredi.
Ushırasıw juwmaǵında Laziz Qudratov Aziya infrastrukturalıq investiciyalar banki prezidentin usı jıldıń 16-19-iyun kúnleri bolıp ótetuǵın Tashkent xalıqaralıq investiciya forumına mirát etti.

Aziza ALIMOVA tayarladı,
ÓzA