Paytaxtımızdaǵı “Ózekspooray” milliy kórgizbeler kompleksinde “Qurılıs – UzBuild 2026” 27-Ózbekstan xalıqaralıq kórgizbesi ashıldı.
Ózbekstan qurılıs hám interer hápteligi sheńberinde ótkerilip atırǵan bul kórgizbede Ózbekstan, AQSh, BAÁ, Germaniya, Gruziya, Ispaniya, Italiya, Koreya Respublikası, Latviya, Malta, Ázerbayjan sıyaqlı 22 mámleketten 450 kompaniya qatnaspaqta.
Qánigelerdiń atap ótiwinshe, bul kórgizbe jergilikli hám sırt el isbilermenlerin bir maqset jolında birlestiriw, óz-ara birge islesiwdi bekkemlewge xızmet etedi.
“Iteca Exhibitions” xalıqaralıq kórgizbe kompaniyası hám onıń sherigi “ICA Eurasia Group” tárepinen shólkemlestirilgen bul háptelik sheńberinde “Qurılıs úskeneleri hám texnologiyaları – BuildTech 2026” qánigelestirilgen bólimi hám Ózbekstan qurılıs sanaatı xalıqaralıq konferenciyası da shólkemlestirildi.
“Iteca Exhibitions” xalıqaralıq kórgizbe kompaniyası bas direktorınıń orınbasarı Ayımxan Babajanovanıń sózlerine bola, qurılıs sanaatı aymaqlardıń ekonomikalıq rawajlanıwında áhmiyetli rol atqaradı hám jańa jumıs orınlarınıń jaratılıwın támiyinleydi.
– Búgingi kúnde qurılıs tarawı Ózbekstan ekonomikasınıń jetekshi tarmaqlarınan birine aylandı. Bul tarmaq jalpı ishki ónimniń 7 procentin quramaqta. Onıń turaqlı ósiwi qurılıs materialları sanaatınıń jedel rawajlanıwına túrtki boldı. Bunday úlken kólemdegi qurılıs jumısların tabıslı ámelge asırıw, “Jańa Tashkent” hám “Jańa Ózbekstan” sıyaqlı iri joybarlardı júzege shıǵarıw ushın innovaciyalıq materiallar hám sheshimlerden paydalanıw talap etiledi. “UzBuild” kórgizbesiniń tiykarǵı maqseti de keń kólemli hám innovaciyalıq qatnaslardı kórsetiwden ibarat. Bul process qatnasıwshılar geografiyasınıń keńeyiwi, kórsetilip atırǵan ónimler hám texnologiyalar sapası jáne túrleriniń izbe-iz ósip atırǵanı menen tastıyıqlanadı, – dedi O.Bobojonova.
Qatnasıwshılar arasında qurılıs materialların islep shıǵarıwshılardıń sanı sezilerli dárejede artıp atırǵanın atap ótiw kerek. Olar házirgi waqıtta ishki bazardıń ósip baratırǵan talapların tabıslı qanaatlandırıp, jedel báseki sharayatında jańa sırt el bazarlarına shıqpaqta.
Kórgizbede 80 nen aslam jergilikli islep shıǵarıwshılar gazobeton bloklar, sendvich paneller, tas buyımlar, qurılıs ximiyası, ayna hám esikler, pol qaplamaları, liftler hám eskalatorlar, fasad sistemaları sıyaqlı ónimleri menen qatnasıwshılardıń itibarın tartpaqta.
Esletip ótemiz, kórgizbe 12-fevral kúni óz jumısın juwmaqlaydı.

Nasiba ZIYoDULLAEVA,ÓzA