Ámiwdárya rayonındaǵı “Yangiobod” mákan puqaralar jıyınında Jınayat isleri boyınsha Ámiwdárya rayonı sudınıń baslıǵı J.Baltabaev basshılıǵında kóshpeli sud májilisi ótkerildi.
Sud májilisinde jazanı ótew dawamında dúzeliw jolına ótken, belgilengen tártip-qaǵıydalarǵa ámel etken hám hadal miynet etken 8 shaxsqa insanıylıq principi qollanılıp, olar Ózbekstan Respublikası Jınayat kodeksiniń 73-statyasına tiykarlanıp jazanı ótewden múddetinen aldın shártli túrde azat etildi.
Atap ótilgenindey, múddetinen aldın shártli azat etiw – bul tek jeńillik emes, al isenim hám juwapkershilik bolıp esaplanadı. Azat etilgen shaxslarǵa bul qarar olar ushın jańa imkaniyat ekeni, usı dáwir dawamında nızam talaplarına qatań ámel etiw zárúr ekenligi túsindirildi. Sonday-aq, ótelmey qalǵan jaza múddeti dawamında bilqastan jáne jınayat islegen jaǵdayda, Jınayat kodeksiniń 60-statyasına muwapıq jaza ilajları qosılıp, bunnan da awır jaza qollanıw múmkinligi haqqında eskertildi.
Ótkerilgen bul kóshpeli sud májilisi mámleketimizde ádillik hám adamgershilik principleriniń ayqın kórinisi ekenligin jáne bir márte kórsetti.

Qaraqalpaqstan xabar agentligi