Qaraqalpaqstan Respublikası Joqarǵı Keńesi hám Ministrler Keńesiniń baslaması menen Shımbay rayonında respublikamız ǵalaba xabar quralları wákilleri ushın Press-tur shólkemlestirildi.
Eń dáslep jurnalistler aymaq xalqınıń bántligin támiyinlep, isbilermenlik baslamaların qollap-quwatlap kiyatırǵan akcionerlik kommerciyalıq «Agrobank», «Xalıq bank» hám «Mikrokreditbank»lerdiń Shımbay rayonı filiallarında bolıp, ol jerlerde tutınıwshılar ushın jaratılǵan sharayatlar hám sońǵı jılları isbilermenlerge jaratılıp atırǵan qolaylıqlar menen jaqınnan tanıstı.
– 2025-jılı filialımızǵa biriktirilgen 6 máhállede jasawshı, úy sharayatında ѳz isbilergenligin jolǵa qoyıw maqsetinde, ѳzin-ѳzi bánt etken puqaralardı qollap-quwatlaw boyınsha «Bizneske birinshi qádem», «Bizneske kómek» hám «Máhálle joybarı» baǵdarlamasına tiykarında 8 663 mln sum kredit ajıratılıp, bunıń nátiyjesinde 342 puqaranıń bántligin támiyinlewge erisildi, – deydi akcionerlik kommerciyalıq «Agrobank» Shımbay rayonı filialı baslıǵı Rustem Sadıqov. – «Uychi» tájiriybesi tiykarında jıl dawamında rayon aymaǵında isbilermenler hám puqaralar menen 36 márte ushırasıp, olarda 93 múrájat óziniń unamlı sheshimin taptı. Al, «Sayxunobod» tájiriybesi tiykarında 281 dana mikrojoybarlar shólkemlestirilip, 314 puqaranıń bántligi támiyinlendi.
– Negizi Xorezm wálayatınıń Xanqa rayonınanbız, – deydi usı bank qarıydarı Yusupbay Kabulov. – Ótken jılı «Agrobank»tiń Shımbay rayonı filialınan «Kabulovlar oilasi» juwapkershiligi sheklengen jámiyetine 70 sotıx jerge ıssıxana qurıw ushın 7 jıl múddetke 1 mlrd sum 14 procentli jeńilletilgen kredit aldıq hám óz jumısımızdı basladıq. Sonnan 2025-jıldıń mart hám avgust aylarında ıssıxanamızǵa pomidor-qıyar nállerin egip, onnan diydilengendey ónim alıwǵa eristik. Sońınan sol eginlerden tapqan dáramatımızdıń esabınan aldınǵı 70 sotıx ıssıxanaǵa qosımsha 1 gektar jerge ıssıxana qurıp, házirgi kúnleri jerlerdi shúdigarlap egiske tayarlap qoyıppız. Jámiyetimizde házirgi waqıtta 15 adam turaqlı jumıs penen támiyinlengen. Sonday-aq, egin egiw hám ónimlerdi jıynaw dáwirinde olarǵa qosımsha 20-30 adamdı máwsimlik jumıs penen támiyinlep atırmız. Bunıń ushın eń áweli húrmetli Prezidentimizge hám bank xızmetkerlerine úlken raxmet aytamız.
– Ótken jılı rayon aymaǵında toyxana qurıw ushın «Xalıq bank»tiń Shımbay rayonı filialınan 7 jıl múddetke 5 mlrd sum jeńillikli kredit alǵan edim, – deydi «Shımbaylı Islambek – Albina» juwapkershiligi sheklengen jámiyeti baslıǵı Abadan Ótepbergenova. – Banktiń usınday jeńillikli kreditiniń arqasında 2025-jıldıń oktyabr ayında 1000 orınlıq «Diydar» atlı toyxana xalıq iygiligi ushın paydalanıwǵa tapsırıldı. Toyxanada xalqımız ushın barlıq qolaylı sharayatlar jaratıp berilgen. Ondaǵı akustikalıq úskeneler, zamanagóy monitor hám muzıkalıq apparaturalar Qıtay Xalıq Respublikasınan alıp kelip, ornatıldı. Bahaların da xalıqqa qolaylı etip qoyıppız.
Sonday-aq, ótkerilgen press-tur dawamında ǵalaba xabar quralları wákilleri Kókshiqala mákan puqaralar jıyını aymaǵında jaylasqan «HD SONS» jámiyetinde bolıp, kárxanada alıp barılıp atırǵan jumıslar menen jaqınnan tanıstı.
– Kárxananıń tolıq quwatlılıqta islewi nátiyjesinde 300 jumıs ornı jaratıldı hám jılına 5 mıń tonna iyirilgen jip ónimleri islep shıǵarıladı – deydi Shımbay rayonı hákimliginiń Málimleme xızmeti baslıǵı Nargiza Tolıbaeva. – Sonnan 8 million dollarlıq ónim eksportqa jiberiliwi rejelestirilgen. Bul álbette, rayonımız ekonomikasınıń joqarılap, aymaq xalqınıń jumıs penen bántliginiń támiyinlewine unamlı tásir etedi.
Ilaj dawamında jurnalistler jámiyet basshılarına ózleriniń sorawların berip, olarǵa tiyisli juwaplar aldı.

Adilbay Orazov,
Qaraqalpaqstan xabar agentligi sholıwshısı