Ózbekstanda sociallıq qollap-quwatlaw, bilimlendiriwdiń sapasın hám bántlikti arttırıwǵa qaratılǵan gezektegi áhmiyetli qararlar qabıl etildi. Bul jańalıqlar 2026-jıldan baslap muǵallimler, kem támiyinlengen shańaraqlar, hayal-qızlar, jaslar hám isbilermenler ushın jańa imkaniyatlar jaratadı.
Belgilengen tártipke muwapıq, usı jıl 1-marttan baslap “máhálle jetiligi”niń juwmaǵı tiykarında Sociallıq reestrge kirgizilgen I topar mayıplıǵı bolǵan hám miynetke jaramlı aǵzası bolmaǵan shańaraqlardıń turaq jay sharayatın jaqsılaw jumısları ámelge asırıladı.
Atap aytqanda, kvartiralardıń diywal hám tóbelerin izolyaciyalaw, energiya únemlewshi ayna hám esik ornatıw, sonday-aq, quyash panelleri yamasa geliokollektorlar ornatıw názerde tutılǵan.
Sonday-aq, 2026-jıl 1-marttan awır kategoriyadaǵı rayonlarda shańaraqlıq isbilermenlikti rawajlandırıw baǵdarlamaları sheńberinde kreditler jıllıq 12 procent stavkada ajıratıladı. Bul xalıqtıń bántligin támiyinlew hám dáramat dereklerin keńeytiwge xızmet etedi.
Jáne bir áhmiyetli jańalıq – 2026-jıl 1-marttan hayal-qızlar belsendisi hám jaslar jetekshisi rayon hám qala hákimi tárepinen lawazımǵa tayınlanadı hám lawazımınan bosatıladı. Bul qarar usı institutlardıń juwapkershiligin hám tásirsheńligin arttırıwǵa qaratılǵan.
Eń úlken itibar kásiplik bilimlendiriw tarawına qaratılmaqta. 2026-jıl 1-iyulden 2028-jıl 1-yanvarǵa shekem Bántlikke kómeklesiw mámleketlik qorınıń qarjıları esabınan kásiplik bilimlendiriwdiń sapasın arttırıwǵa qaratılǵan jańa subsidiyalar engiziledi. Sonıń ishinde, oqıtıwshılar hám óndirislik bilimlendiriw ustalarına xalıqaralıq dárejede tán alınǵan hám milliy kásiplik sertifikatlardı alıw ushın jumsalǵan qarjılardıń 50 procenti qaplap beriledi. Bul muǵdar BEMniń 20 esesine shekem bolıwı múmkin.
Bunnan tısqarı, mamanlıqtı bahalaw orayların shólkemlestirgen isbilermenlerge satıp alınǵan bahalaw quralları qárejetleriniń 30 procenti, biraq BEMniń 200 esesinen aspaǵan muǵdarda subsidiya ajıratıladı.
Bul qararlar bilimlendiriwdiń sapasın arttırıw, kásiplik mamanlıqtı rawajlandırıw, sociallıq qorǵawdı kúsheytiw hám xalıqtıń bántligin támiyinlew jolında áhmiyetli qádem sıpatında bahalanbaqta.

Muhayyo Toshqoraeva,
ÓzA