Kámbaǵallıqtı qısqartıw, xalıqtıń sociallıq qorǵawǵa mútáj qatlamların qollap-quwatlaw hám “jasıl” ekonomikanı rawajlandırıw mámleketlik siyasattaǵı tiykarǵı baǵdarlardan biri bolıp esaplanadı.
Usı maqsette “awır” máhállelerde qosımsha dáramat dereklerin jaratıwǵa qaratılǵan gezektegi áhmiyetli qarar qabıl etildi.
Atap aytqanda, 2026-jıl 9-fevralda qabıl etilgen “Awır máhállelerde kishi quyash elektr stanciyaların qurıw arqalı kámbaǵal shańaraqlardı qollap-quwatlawdıń qosımsha ilajları haqqında”ǵı Prezident qararı usılardıń qatarına kiredi.
Qararǵa muwapıq, “awır” máhállelerde dáramat keltiretuǵın aktiv sıpatında quwatlılıǵı 300-500 kVt saat bolǵan kishi quyash elektr stanciyaların iske qosıw belgilendi. Bul joybarlardı qarjılandırıw ushın Tikleniw hám rawajlanıw qorı tárepinen 110 million AQSh dolları muǵdarında qarjı ajıratılıwı názerde tutılǵan.
Hújjette belgilengenindey, bir ay múddette tómendegi máselelerdi qamtıp alǵan Prezident qararınıń joybarı kirgiziledi:
– kishi quyash elektr stanciyaların nızamshılıqta belgilengen tártipte joybarlastırıw, mámleketlik ekspertizadan ótkeriw, tender tiykarında jumıstı bólip alıp islewshi shólkemdi anıqlaw hám qurılıs-montajlaw jumısların shólkemlestiriw;
– usı stanciyalardı paydalanıwǵa qabıl etiw hám olardı nátiyjeli basqarıwdı támiyinlew;
– quyash elektr stanciyalarında islep shıǵarılǵan elektr energiyasın satıwdan túsken qarjılardı bólistiriw mexanizmlerin belgilew.
Bul qarar “awır” máhálleler xalqınıń dáramat dereklerin keńeytiw, jasıl energiyadan paydalanıwdı qollap-quwatlaw hám sociallıq turaqlılıqtı bekkemlewge xızmet etedi.

Hamroz Bayanov,
ÓzAnıń xabarshısı