Respublikamızda medicina tarawında sırt mámleketler menen birge islesiw jumısları jetilistirilip, xalıqtıń salamatlıǵın qorǵaw boyınsha zaman talapları tiykarında jańalıqlar engizilmekte.
Sonıń ishinde, sońǵı jılları Ózbekstan Respublikası hám Izrail mámleketi sırtqı isler ministrliginiń “MASHAV” agentligi arasında birge islesiw jumısları jedel rawajlanbaqta. Ásirese, agentliktiń medicina tarawında alıp barıp atırǵan keń kólemli jumıslarınıń nátiyjesinde jolǵa qoyılǵan joybarları óziniń unamlı nátiyjesin berip atır. Usınday joybarlardıń biri Qaraqalpaqstandaǵı “Mehirli insanlar” qorı tárepinen ámelge asırılıp, Qaraqalpaqstan Respublikası aymaqlıq balalar medicinalıq reabilitaciya orayında suw menen emlew procedurasın ótkeriw ushın barlıq qolaylıqlarǵa iye xana shólkemlestirildi hám kerekli úskeneler menen támiyinlendi.
Jaqında usı qordıń wákilleri bul orayda bolıp, nawqaslarǵa jaratılǵan imkaniyatlar menen tanıstı. Sonday-aq, óz gezeginde nawqaslar hám olardıń ata-anaları da bul jaratılǵan sharayatlardan qanaatlanıp, kelgen miymanlarǵa óz minnetdarshılıǵın bildirdi.
– Bul jaratılǵan sharayatlar óz gezeginde orayımızda emlenip atırǵan balalardıń tezirek sawalıp ketiwine járdem beredi. Sebebi, hawa-kóbikli suw menen kurslı emlew organizmniń qorǵanıw kúshlerin arttıradı. Qan hám limfa aylanısınıń jaqsılanıwı esabınan immun sisteması aktivlesedi. Ayaqtıń tabanında jaylasqan barlıq noqatlar arqalı gidro vanna menen organizmdegi qan aylanısın aktivlestiredi hám immunitetti kóteredi – deydi Qaraqalpaqstan Respublikası aymaqlıq balalar medicinalıq reabilitaciya orayı direktorı Gúlistan Nazarımbetova. – Usınday qolaylı sharayatlardı jaratıp bergeni ushın “Mehirli insanlar” qorına úlken raxmet aytamız.

Adilbay Orazov,
Qaraqalpaqstan xabar agentligi sholıwshısı