Shay qalta – shay ushın arnalǵan kestelengen qalta bolıp, I.V.Savickiy atındaǵı muzey kollekciyasındaǵı erkekler kiyimleriniń siyrek ushırasatuǵın biybaha buyımlarınıń biri.
Sapar dawamında zárúr bolǵan shay hám qumshekerdi saqlaw ushın er jigitler onı ózleri menen alıp júrgen. Ondaǵı hár bir naǵıs óz aldına mániske iye: “múyiz” sıyaqlı milliy naǵıslar qorǵawshı belgi bolıp, jaqsı tileklerdi ańlatqan. Shay qalta ápiwayı kestelengen qalta emes, al, jas kelin hám kúyew arasındaǵı mehir-muhabbattıń, sadıqlıqtıń belgisi esaplanǵan. Pátiya (atastırıw) dan soń qız keleshektegi ómirlik joldası ushın shay qaltanı arnawlı kestelegen – bul septiń bir bólegi bolıp, onıń sheberligin, shıdamlılıǵın sáwlelendirgen.
Búgingi kúnde shay qalta qaraqalpaq kesteshiliginde siyrek ushırasatuǵın xalıqtıń materiallıq emes mádeniy miyrasınıń áhmiyetli gúwası sıpatında qádirlenedi. Bunday buyımlardı puqta saqlaw arqalı muzey kórkem óner shıǵarmasına aylanǵan dástúrler esteligin saqlap kelmekte.

Qaraqalpaqstan xabar agentligi.