Oliy Majlis Nızamshılıq palatasındaǵı Ózbekstan Ekologiyalıq partiyası frakciyasınıń gezektegi májilisinde Ózbekstan Respublikası Oliy Majlisi Insan huqıqları boyınsha wákili (ombudsman)niń 2025-jıldaǵı jumısı haqqındaǵı esabatı kórip shıǵıldı.
Atap ótilgenindey, ótken dáwirde Ombudsman mámleketlik uyımlar, sonıń ishinde, huqıq qorǵaw hám qadaǵalaw uyımları, kárxanalar, mákemeler, shólkemler jáne lawazımlı shaxslar tárepinen insan huqıqları menen erkinlikleri haqqındaǵı nızamshılıqqa ámel etiliwi ústinen tásirsheń hám nátiyjeli parlamentlik qadaǵalawdı ámelge asırǵan. Esabat jılında Insan huqıqları boyınsha wákil (ombudsman) atına mámleketimiz hám sırt mámleketlerdiń puqaraları jáne ombudsmanları, puqaralıǵı bolmaǵan shaxslar, jámiyetlik shólkemler hám basqa da yuridikalıq táreplerden 26 mıń 372 múrájat kelip túsken.
Puqaralardıń múrájatların kórip shıǵıw hám olardıń buzılǵan huqıqların tiklew Ombudsman jumısında tiykarǵı orın iyelegen. Atap aytqanda, parlamentlik qadaǵalaw hám puqaralardıń múrájatları tiykarında 2025-jılı Ombudsman tárepinen puqaralardıń buzılǵan huqıqların tiklew maqsetinde 194 tásir ilajı qollanılǵan. Puqaralardıń máplerine jámi 11 mlrd. 82 mln. sum óndirilgen.
Sonday-aq, kóplegen puqaranıń miynetke baylanıslı huqıqları tiklengen. Buzılǵan miynet huqıqların tiklew maqsetinde xalıqtıń ázzi qatlamına “pro bono” túrinde sudlarǵa 88 arza, shaǵım arza hám shaǵımlar kirgiziliwinde járdem berilgen.
Bayanatta keltirilgen maǵlıwmatlarǵa bola, ekologiyalıq huqıqlar menen baylanıslı múrájatlar tiykarında bir qatar aymaqlarda monitoring jumısları ámelge asırılǵan. Sonıń ishinde, óndiris kárxanalarınıń jumısı nátiyjesinde qorshaǵan ortalıqqa unamsız tásir kórsetken jaǵdaylar boyınsha kárxanalarda zamanagóy shań hám gaz uslaw qurılmaları ornatılǵan, qorshaǵan ortalıqqa jetkerilgen zıyan ushın kompensaciya qarjılarınıń óndiriliwi támiyinlengen.

M.Komilova, ÓzA