Islamabad qalasında bolıp ótken Ózbekstan-Pakistan biznes forumı sheńberinde Ózbekstan Respublikası Prezidenti Shavkat Mirziyoev “HRL Group” kompaniyasınıń baslıǵı Zohid Rafiq penen ushırasıw ótkerdi.
“HRL Group” kompaniyalar toparı qurılıs, taw-kán sanaatı hám energetika tarawlarında jumıs alıp baratuǵın iri xalıqaralıq kárxanalardan biri bolıp esaplanadı.
Ushırasıw waqtında Ózbekstan tájiriybesin qollanǵan halda Pakistan aymaǵındaǵı mıs, altın hám oǵada áhmiyetli minerallar kánlerinde birgeliktegi geologiyalıq-izlew jumısların alıp barıw perspektivaları dodalandı.
Sonday-aq, usı ushırasıwlar sheńberinde Taw-kán sanaatı hám geologiya ministrligi basshılıǵındaǵı Ózbekstan delegaciyası “HRL Group” kompaniyasınıń wákilleri menen sóylesiwler ótkerdi. Taw-kán sanaatı hám geologiya ministriniń keńesgóyi B.Narmatov hám “Uzbek Overseas Geology Company”dıń bas direktorı X.Omonov sóylesiwlerdiń juwmaqları boyınsha eki mámleket arasında geologiya-izlew jumısların ámelge asırıwǵa qaratılǵan óz-ara birge islesiw memorandumına qol qoydı.
Bul kelisim Ózbekstan hám Pakistan arasında taw-kán hám geologiya tarawlarındaǵı strategiyalıq birge islesiwdi jáne de bekkemlewge xızmet etedi.

ÓzA