Usı jıldıń fevral ayınıń aqırına shekem mámleketlik mektepke shekemgi bilimlendiriw shólkemlerinde tárbiyalanıp atırǵan balalar grippke qarsı biypul shanshıladı. Bunıń ushın mámleket tárepinen 520 mıń doza grippke qarsı vakcina satıp alınıp, aymaqlarǵa jetkerip berildi.
Bul haqqında Sanitariyalıq-epidemiologiyalıq tınıshlıq hám jámiyetlik salamatlıq komitetiniń málimleme xızmeti málim etti.
Qánigelerdiń atap ótiwinshe, mektepke shekemgi jastaǵı balalar gripp virusına qarsı eń qorǵansız qatlam esaplanadı. Jámáátte balalar kóp bolǵanı sebepli infekciya tez tarqaladı hám kesellik awır ótiwi múmkin. Ásirese, qıs máwsiminiń aqırı – fevral ayında gripp asqınıwlar menen belgili bolıw qáwpi joqarı boladı.
Fevral ayında ótkerilip atırǵan shanshıw arqalı balalar pnevmoniya, bronxit, otit sıyaqlı awır asqınıwlardan qorǵaladı, sonday-aq, mektepke shekemgi bilimlendiriw shólkemlerinde ǵalaba keselleniw jaǵdaylarınıń aldı alınadı. Atap ótiliwinshe, gripp virusları fevral-mart aylarında da jedel boladı. Vakcina jiberilgennen soń 10-14 kún ishinde bala organizminde immunitet qáliplesip, máwsim aqırına shekem qorǵaw támiyinlenedi.
Medicinalıq maǵlıwmatlarǵa bola, gripp ápiwayı ayazlaw emes. Ol balalarda joqarı temperatura, kúshli záhárleniw, dem alıw qıyınlasıwı hám ókpe isiwi sıyaqlı awır jaǵdaylarǵa alıp keliwi múmkin. Statistikalıq baqlawlar shanshılmaǵan balalarda kesellik awır ótiwi hám asqınıwlar kóbirek ushırasatuǵının kórsetpekte. Emlew bolsa keselleniw qáwipin azaytıw menen birge, keselliktiń jeńil túrde ótiwin támiyinleydi.
Qánigelerdiń atap ótiwinshe, grippke qarsı shanshıw balanıń immun sistemasın bekkemleydi, jámáátte infekciya tarqalıw shınjırın úzedi. Bul bolsa tek ǵana balalar ushın emes, al ata-analar hám bilimlendiriw mákemeleri ushın da ayrıqsha áhmiyetke iye.
Xabarda atap ótiliwinshe, shanshıw procesinde barlıq balalar shıpaker kóriginen ótkeriledi hám tek ǵana salamat balalar shanshıladı. Grippke qarsı vakcinalar qáwipsiz hám nátiyjeli bolıp, kóp jıllıq medicinalıq ámeliyatta óz nátiyjesin dálillegen.
Qánigeler ata-analardı balaların óz waqtında shanshıwǵa shaqırıp, shanshıw salamat keleshekti támiyinlewde eń isenimli qurallardan biri ekenin atap ótpekte.

Mohigul QOSIMOVA,
ÓzAnıń xabarshısı