Qaraqalpaqstan Respublikası bajıxana basqarmasında baslanǵısh Kásiplik awqamı tárepinen 2025-jılı ámelge asırılǵan jumıslar hám keleshektegi rejeler boyınsha jeke quramǵa esabat berildi. Májiliste Ózbekstan mámleketlik mákemeleri hám jámiyetlik xızmet xızmetkerleri kásiplik awqamı Qaraqalpaqstan keńesi baslıǵınıń orınbasarı, bajıxana basqarmasınıń basshıları hám jeke quramı qatnastı.
Esabatta atap ótiliwinshe, 2025-jıl dawamında xızmetkerlerdiń sociallıq qorǵalıwın kúsheytiw maqsetinde 1 xızmetkerge 300 mln. sum muǵdarında ssuda berilgen. AT “Aloqa bank” penen birgelikte 5 xızmetker turaq jay satıp alıwı ushın tómen procentli ipoteka kreditleri menen támiyinlendi. Al, 3 xızmetker hám olardıń ata-anaları salamatlandırıw orınlarına jeńilletilgen jollama alıwda ámeliy járdem kórsetildi. Xızmetkerlerdiń mádeniy dem alıwı ushın 95 teatr hám koncertlerge biletler satıp alındı. Xızmetkerlerdiń perzentleri ushın jańa jıldaǵı saxnalastırılǵan bayramlarǵa biletler satıp alınıwı támiyinlendi.
Sonday-aq, 26-yanvar – Ózbekstan Respublikası mámleketlik bajıxana xızmeti uyımları xızmetkerleri kúni múnásibeti menen baslanǵısh Kásiplik awqamı shólkemi qarjıları esabınan 70 xızmetkerge bahalı sawǵalar tapsırıldı. Bunnan tısqarı, bajıxana xızmetkerleriniń perzentlerin joqarı bilimlendiriw mákemelerine kiriwinde qollap-quwatlaw maqsetinde Bajıxana komiteti Baslıǵınıń usınısları tiykarında ótken jıllar dawamında jámi 12 xızmetkerdiń perzenti respublikamızdıń abıraylı joqarı oqıw orınlarına mámleketlik grant tiykarında studentlikke qabıl etildi.
Ilaj juwmaǵında 2026-jılı ámelge asırılatuǵın jumıslar rejesi dodalanıp, aldaǵı wazıypalar kelisip alındı.

Á.Jiyemuratov,
Qaraqalpaqstan xabar agentligi.