Qaraqalpaqstan Respublikası Ministrler Keńesiniń Baslıǵı Farxod Ermanov fizikalıq hám yuridikalıq tárepler menen óziniń gezektegi jeke qabıllawın ótkerdi. Qabıllaw dawamında puqaralar tárepinen bántlik, kadastr, qurılıs tarawı boyınsha hám sociallıq-ekonomikalıq máselelerge baylanıslı múrájatlar bildirildi.
Ministrler Keńesiniń Baslıǵı hár bir múrájattı hár tárepleme tıńlap, juwapker shólkem hám uyımlardıń basshılarına nızamlı tiykarda operativ ilajlar kóriw, mashqalalardı ornına shıǵıp úyreniw hám belgilengen múddetlerde unamlı sheshiw boyınsha anıq tapsırmalar berdi.
Qabıllaw dawamında ayırım máseleler ornında sheshildi, qosımsha úyreniwdi talap etetuǵın múrájatlar boyınsha juwapkerlerge qadaǵalawǵa alıw belgilendi. Atap ótilgenindey, puqaralardıń múrájatları menen islesiw – mámleketlik uyımlar jumısınıń tiykarǵı baǵdarlarınan biri bolıp, hár bir múrájat nızam sheńberinde kórip shıǵıladı.
Bul qabıllaw xalıq penen ashıqtan-ashıq sóylesiwdi jolǵa qoyıw, bar mashqalalardı óz waqtında anıqlaw hám olardı nátiyjeli sheshiwge xızmet etti.

Qaraqalpaqstan xabar agentligi