Qaraqalpaqstan Respublikası Ishki isler ministrligi sistemasında kóp jıllar dawamında pidayılıq penen xızmet etken, elimizdiń tınıshlıǵı hám abadan turmısın támiyinlewge múnásip úles qosqan, xalkımızdıń sheksiz húrmetine bólengen, Qaraqalpaqstan Respublikasına miyneti sińgen yurist, II dárejeli «Shon-sharaf» ordeniniń iyesi, otstavkadaǵı general-mayor Jańabay Palımovich Shılmanov 86 jasında qaytıs boldı.
Marhumnıń qaytıs bolıwı múnásibeti menen shańaraq aǵzaları, jaqınları, kásiplesleri hám shákirtlerine tereń qayǵırıw menen kewil aytamız.
General-mayor Jańabay Palımovich Shılmanov 1940-jılı 16-noyabr kúni Qaraqalpaqstan Respublikasınıń Kegeyli rayonında dúnyaǵa kelgen.
1957-jılı rayon orayındaǵı orta mektepti pitkerip, 1957-1962-jılları Tashkent mámleketlik pedagogikalıq institutınıń inglis filologiyası fakultetinde oqıǵan hám ol jerdi jeńillikli diplom menen tabıslı pitkergen.
Miynet jolın 1962-1965-jılları Tınısh okeanı áskeriy-teńiz flotı qatarında instruktor sıpatında baslaǵan. Bul xızmet dawamında oǵan dáslepki «leytenant» áskeriy sheni berilgen hám «Ayrıqsha xızmetleri ushın» medalı menen sıylıqlanǵan. Keyin ala Kegeyli rayonındaǵı orta mektepte muǵallim, rayonlıq jaslar keńesi baslıǵı lawazımlarında xızmet etken.
1966-jılı Mámleketlik qáwipsizlik komiteti qatarına qabıllanıp, Minsk qalasındaǵı arnawlı mektepti pitkergen hám usı xızmettiń joqarı arnawlı jawıngerlik tayarlıǵınan ótken. 1980-1981-jılları «Kaskad-2» arnawlı toparı quramında Awǵanstanda jawıngerlik xızmet wazıypaların orınlaǵan.
Keyin ala Ózbekstan Respublikası Mámleketlik qáwipsizlik komitetinde bólim baslıǵı, Qaraqalpaqstan Respublikası Mámleketlik qáwipsizlik komiteti baslıǵınıń orınbasarı, 1983-1987-jılları Qaraqalpaqstan Respublikası partiya komitetiniń Hákimshilik bólimi baslıǵı lawazımlarında juwapkershilikli jumıs alıp barǵan.
1987-jıldan Qaraqalpaqstan Respublikası Ishki isler ministriniń orınbasarı, 1991-2002-jılları Qaraqalpaqstan Respublikası Ishki isler ministri lawazımında xızmet etip, sistemanıń rawajlanıwı hám jámiyetlik qáwipsizlikti támiyinlewge salmaqlı úles qosqan.
Xalqımız aldındaǵı pidayılıq penen etken xızmetleri ushın Jańabay Shılmanov «Ishki isler general-mayorı» joqarı áskeriy sheni, II dárejeli «Shon-sharaf» ordeni hám Qaraqalpaqstan Respublikasına miyneti sińgen yurist húrmetli ataǵı menen sıylıqlanǵan.
Jańabay Shılmanov ómirlik joldası menen tórt perzentti kamalǵa keltirip, olardı joqarı maǵlıwmatlı maman kadrlar etip tárbiyaladı. Olardıń ekewi ákesiniń kásibin múnásip dawam ettirdi.
2002-jıldan húrmetli demalısqa shıqqan general-mayor Jańabay Shılmanov Qaraqalpaqstan Respublikası Joqarǵı Keńesinde komitet baslıǵı, sonday-aq, Konstituciyalıq baqlaw komitetiniń baslıǵı lawazımlarında da uzaq jıllar dawamında nátiyjeli jumıs alıp bardı.
Pidayı insan, húrmetli nuranıy, ádiwli ustaz Jańabay Palımovich Shılmanovtıń jarqın esteligi xalqımızdıń júrek tórinde máńgi saqlanıp qaladı.

A.Orınbaev, F.Ermanov, R.Nurazizov, A.Atajanov, B.Tórebekov, T.Abdijabbarov, A.Daniyarov.