Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń basshılıǵında korrupciyaǵa qarsı gúresiw hám jınayatshılıqtıń aldın alıw ilajların kúsheytiw, sonday-aq, jaslar siyasatı hám ruwxıy-aǵartıwshılıq tarawında alıp barılıp atırǵan jumıslarǵa arnalǵan májilis ótkerildi.
Onda Ministrler Keńesiniń Baslıǵı F.Ermanov qatnastı.
Májiliste jınayatshılıq hám huqıqbuzarlıqtıń aldın alıw, jámiyetlik qáwipsizlikti támiyinlew, orınlarda túrli jınayatlardıń júz beriwiniń aldın alıw baǵdarında alıp barılıp atırǵan jumıslar hám bul baǵdarda jol qoyılıp atırǵan qáte-kemshilikler dodalandı. Sonday-aq, jaslar menen tıǵız islesiw, olardı hár tárepleme qollap-quwatlaw, ruwxıylıq hám aǵartıwshılıq tarawında belgilengen wazıypalardıń orınlanıwın támiyinlew máseleleri de kórip shıǵıldı.
Ótkerilgen májilis dawamında máhállelerde tınıshlıqtı saqlaw, jámiyetlik qáwipsizlikti hám puqaralardıń tınıshlıǵın támiyinlew, jaslar arasında jınayatshılıqtıń aldın alıw, máhállelerdegi sociallıq profilaktikalıq ilajlardıń alıp barılıwı máseleleri de keń túrde talqılandı.
Bunnan tısqarı, korrupciyanıń aldın alıw baǵdarındaǵı ilajlar boyınsha respublika prokurorı, jınayatshılıqtıń aldın alıw hám kriminogen jaǵdaydı turaqlastırıw ilajları haqqında Ishki isler ministri, sonday-aq, ruwxıylıq hám aǵartıwshılıq tarawındaǵı jumıslardıń barısı boyınsha Joqarǵı Keńestiń komitet baslıǵınıń bayanatları tıńlandı.
Májiliste orınlarda jol qoyılıp atırǵan qáte-kemshilikler kórsetip ótilip, ayırım basshılardıń óz wazıypasına nemquraydılıq penen qarap atırǵanı sınǵa alındı.

Qaraqalpaqstan xabar agentligi