«Qar jawdı dep quwanba, ayazı bolar sońınan» degenindey appaq qar qıs máwsiminiń sáni bolıp, hawa tazalanıp, adamǵa jaqsı keypiyat baǵıshlaǵanı menen qardıń sońınan bolatuǵın suwıq hám jollardaǵı qolaysızlıqlar jolawshılarǵa qıyınshılıqlardı keltirip shıǵaradı. Usınday waqıtta juwapker mákemelerdiń jumıs islew procesi opreativlikti talap etedi.
Qaraqalpaqstan Respublikası Avtomobil jolları bas basqarmasınıń baspasóz xatkeri D. Jumamuratov basqarma xızmetkerleri tárepinen alıp barılıp atırǵan jumıslardı tómendegishe málim etti:
– Kúni keshe Nókis qalasında qar jawǵanlıǵı sebepli qala kóshelerinde jol-transport háreketi qáwipsizligin támiyinlew boyınsha operativ ilajlar kórildi. Qaraqalpaqstan Respublikası Avtomobil jolları bas basqarması sistemasındaǵı shólkemler tárepinen arnawlı texnika hám brigadalar tartıldı.
Jollarda muzlaw jaǵdaylarınıń aldın alıw maqsetinde avtomobil jol qatnaw bólimlerine qum-duz aralaspası sebildi, sonday-aq, qar tazalaw jumısları úzliksiz dawam ettirilmekte. Bul jumıslar qala kóshelerinde puqaralardıń qáwipsiz hám erkin háreketleniwin támiyinlewge qaratılǵan.
Sonıń menen birge, bul ilajlar tek ǵana Nókis qalasında emes, al respublikanıń basqa da rayonlarında jol xojalıǵı xızmetkerleri tárepinen sistemalı túrde ámelge asırılmaqta. Jollardı qardan tazalaw hám qum-duz aralaspasın sebiw jumısları aymaqlar kesiminde úzliksiz dawam ettirilmekte.

Qaraqalpaqstan xabar agentligi