Búgin Berdaq atındaǵı Qaraqalpaq mámleketlik universitetinde Mırza Ulıǵbek atındaǵı Ózbekstan milliy universiteti rektorı menen eki tárepleme birge islesiw boyınsha memorandumǵa qol qoyıldı.
Ushırasıwǵa Mırza Ulıǵbek atındaǵı Ózbekstan Milliy universiteti rektorı professor Inomjon Madjidov hám metodikalıq támiynat hám bilimlendiriw sapasın qadaǵalaw boyınsha prorektor Ravshan Musurmonov, Qaraqalpaq mámleketlik universiteti oqıw isleri boyınsha prorektorı Olimjon Dúysenbaev, Ilimiy isler hám innovaciyalar boyınsha prorektorı Izimbet Turdımambetov, universitettiń Magistratura bólimi baslıǵı Ilimpaz Allambergenov doktorantlar hám magistrantlar qatnastı.
Ushırasıwdıń tiykarǵı maqseti joqarı oqıw orınları arasındaǵı ilim, bilimlendiriw, innovaciyalıq jumıs, ulıwma alǵanda ilim, bilimlendiriw hám óndiristiń integraciyasın támiyinlew boyınsha óz-ara birge islesiwdi jáne de rawajlandırıw bolıp esaplanadı. Ilaj dawamında Inomjon Majidov Ózbekstan milliy universiteti haqqında jıynalǵanlarǵa maǵlıwmat berdi.
Atap aytqanda, 108 jıldan berli kadrlar tayarlap kiyatırǵan bul universitettiń tek ǵana Aziya mámleketleri emes, al pútkil dúnya júzi boyınsha ornı ayrıqsha. Házirgi kúnde 56 tálim baǵdarı boyınsha studentler oqıtılıp, olarǵa 19 akademik, 250 ilim doktorları hám professorlar, 450 den aslam ilim kandidatları hám docentler bilim beredi.
Qaraqalpaq mámleketlik universiteti magistrantları hám doktorantları da endi usı universitet professorları menen birge islesiwi, kitapxana bazası hám ilimiy bazadan paydalanıwı múmkin ekenligi atap ótildi.
Ilaj dawamında jıynalǵanlar menen pikir alısıldı. Magistrantlar hám doktorantlar ózleriniń usınısların bildirip, qızıqtırǵan sorawlarına juwap aldı.

Biybisanem Joldasbaeva,
Berdaq atındaǵı QMU dıń 2-kurs magistrantı.
Qaraqalpaqstan xabar agentligi.