Xalıq wákili – bul tek lawazım emes, al xalıqtıń kúndelikli mashqalaları menen jaqınnan shuǵıllanatuǵın shaxs bolıp esaplanadı. ÓzLiDePten Xalıq deputatları Ámiwdárya rayonlıq Keńesine 3-Doslıq saylaw okruginen saylanǵan Madamin Kazakov mine usınday belsendi wákil sıpatında ayrıqsha itibarǵa ılayıq.
Deputatlıq jumısı dawamında Madamin Kazakov jergilikli byudjet hám ekonomikalıq reformalar, isbilermenlikti qollap-quwatlaw máseleleri boyınsha turaqlı komissiyanıń baslıǵı sıpatında xalıqtıń áhmiyetli mashqalalarına ámeliy sheshim tabıwǵa qaratılǵan bir qatar jumıslardı ámelge asırmaqta. Ol óziniń deputatlıq jumısı dawamında xalıqtı qıynap kiyatırǵan áhmiyetli mashqalalardı sheshiw maqsetinde juwapker shólkemlerge 7 deputatlıq soraw kirgizip, olardıń orınlanıwın qatań qadaǵalawǵa alǵan.
Deputattıń sorawları tiykarında rayonda bir qatar unamlı jumıslar ámelge asırıldı. Atap aytqanda, deputattıń “Farovon” máhállesindegi saylawshıları menen bolǵan ushırasıwında “Náwbáhár” kóshesinde 2001-jılı xalıq tárepinen kómek jolı menen qurılǵan kópirdiń avariyalıq jaǵdayǵa kelgenligi haqqında múrájat kelip túsken edi. Aymaqta kópirdiń paydalanılıwı xalıq ushın qáwipli jaǵday jaratıp atırǵanı sebepli deputat bul máseleni ornına shıǵıp úyrendi hám tiyisli uyımlarǵa soraw jiberdi.
Soraw nátiyjesinde Islam rawajlanıw banki tárepinen kópirdi qayta qurıw ushın zárúr qarjı ajıratılıp, qurılıs jumısları baslandı. Qurılıs jumısları rejesine muwapıq alıp barılmaqta hám usı jıldıń mart ayında tolıq juwmaqlanıwı kútilmekte. Bul xalıq ushın qáwipsiz hám qolaylı háreketleniwdi támiyinleytuǵın áhmietli ilaj bolıp esaplanadı.
Sonday-aq, “Farovon,” “Yangiobod” hám “Dwstlik” mákan puqaralar jıyınlarında qıytaq jerlerdi suwǵarıwda suw jetispewshiligi máselesi boyınsha da múrájatlar kelip tústi. Aymaq turǵınları tárepinen bildirilgen bul mashqalaǵa deputat aralasıwı hám sorawnama arqalı ámeliy sheshim tabıldı. Nátiyjede, eki dana nasos qurıp berildi hám házirgi waqıtta 320 shańaraqtıń qıytaq jerlerine suw jetip barıwı támiyinlendi. Sonıń menen birge, suwdı aqılǵa uǵras únemlew hám kanallardı úzliksiz paydalanıw maqsetinde kanallardı betonlaw jumısları da ámelge asırılmaqta.
Bunnan tısqarı, máhállelerdegi 21 kóshe jollarınıń jaǵdayı xalıq ushın úlken qıyınshılıq tuwdırıp kiyatırǵanı – ásirese, jawınlı hám qarlı kúnlerde háreketleniwdi derlik imkansız etip atırǵanı haqqında da deputatqa múrájat kelip tústi. Bul másele deputat tárepinen tiyisli shólkemler menen úyrenildi hám 21 kóshege щeben-qum aralaspası (ЩPS) tósew jumıslarına mart ayınan start beriliwi belgilendi. Bul ilajlar máhálle xalqı ushın áhmiyetli sociallıq áhmiyetke iye bolıp, turmıs sapasın sezilerli dárejede jaqsılawǵa xızmet etedi.
Ámelge asırılıp atırǵan bul jumıslar xalıqtıń múrájatların unamlı sheshiw, infrastrukturanı modernizaciyalaw hám máhállede turmıslıq áhmiyetke iye máselelerdi saplastırıwǵa qaratılǵan bolıp, deputatlıq qadaǵalawda dawam ettirilmekte.

Qaraqalpaqstan xabar agentligi