Isbilermenler háreketi – Ózbekstan Liberal-demokratiyalıq partiyasınan Xalıq deputatları Nókis rayonlıq Keńesine 12-sanlı “Órnek” saylaw okruginen saylanǵan deputat Marat Aminov saylawshılar menen náwbettegi ushırasıwın ótkerdi.
Ushırasıw “Diyqan arna” mákan puqaralar jıyını aymaǵında shólkemlestirilip, onda máhálle belsendileri, nuraniylar, jaslar hám keń jámiyetshilik wákilleri belsene qatnastı.
Ilaj dawamında deputat tárepinen Ózbekstan Respublikası Prezidenti Shavkat Mirziyoevtiń Oliy Majlis hám Ózbekstan xalqına jollaǵan Múrájatında belgilengen 6 tiykarǵı baǵdardıń mazmun-mánisi keńnen túsindirip berildi. Sonday-aq, mámleketti uzaq múddetli rawajlandırıwǵa qaratılǵan jetilistirilip atırǵan “Ózbekstan – 2030” strategiyasınıń tiykarǵı maqset hám wazıypaları, xalıqtıń turmıs dárejesin arttırıw, isbilermenlikti qollap-quwatlaw, bántlikti támiyinlew hám aymaqlardı kompleksli rawajlandırıwǵa qaratılǵan tiykarǵı baǵdarlarǵa toqtalıp ótildi.
Ushırasıwdıń eń áhmiyetli bólegi puqaralardıń múrájatların tıńlawǵa baǵıshlandı. Xalıq tárepinen kommunallıq xızmetlerdiń sapası, infrastrukturanı jaqsılaw, jumıs orınların jaratıw, jaslar hám hayal-qızlar máselelerine baylanıslı bir qatar usınıs hám mashqalalar bildirildi.
Deputat tárepinen hár bir múrájat itibar menen tıńlanıp, olardıń sheshimin tabıw boyınsha tiyisli shólkemler menen birgelikte jumıs alıp barıw, ayırım máselelerdi deputatlıq qadaǵalawǵa alıw belgilendi.

Qaraqalpaqstan xabar agnetligi