Sońǵı jılları elimizde sportqa, sonıń ishinde, balalar futbolına qaratılıp atırǵan ayrıqsha itibar hám qollap-quwatlawdıń nátiyjesinde, dúnya futbolında óz ornına iye kúshli futbolshılar ósip jetilispekte.
Solar arasında, Eldor Shomuradov, Abduqodir Xusanov, Abbos Fayzullaev hám Muhammadaali Wrinbaev sıyaqlı futbolshılardı aytıp ótsek boladı. Mine usınday futbolshılardıń qolǵa kirgizip atırǵan tabısların ózlerine úlgi etip alǵan qaraqalpaqstanlı jas futbolshılar da Ózbekstan chempionatı hám kuboklarında ózleriniń sheberliklerin kórsetip, hár jılı 2-3-futbolshı mámleketimizdiń jas óspirimler hám jaslar saylandı komandalarına aǵza etip alınbaqta. Sonıń menen birge, olar elimizdiń eń kúshli klubları menen shártnama dúzip, házirgi kúni usı komanda quramında tabıslı oyın kórsetpekte. Atap aytqanda, kelesheginen úlken úmit kúttiretuǵın jas futbolshılarımızdan Ázizbek Erimbetov hám Nurbek Sársenbaevlar mámleketimizdiń ótken jılǵı máwsimi chempionı Ferǵananıń «Neftchi» klubında oynap atırǵan bolsa, ótken jılı «Olimpik MobiUz»da oynaǵan jerleslerimizden dárwazaman Samandar Muratbaev bıyılǵı jılı Qarshınıń «Nasaf», yarım qorǵawshı Muxammedali Reymov Tashkenttiń «Lokomotiv» komandası aǵzasına aylandı.
Álbette, bul transferler respublikamız jas futbolshılarına úlken motivaciya boldı dep ayta alamız hám olardıń aldaǵı karreasına tabıslar tileymiz.

Adilbay Orazov,
Qaraqalpaqstan xabar agentligi sholıwshısı.