Tashkent qalasında futbol boyınsha Ózbekstan Pro-ligası hám kubogi jarıslarına puqta tayarlıqlar kórip atırǵan Nókistiń «Aral» klubı jańa máwsim aldınan bir neshe klublar menen joldaslıq oyınların ótkerdi.
Atap aytqanda, 5-fevral kúni Tashkent qalasındaǵı Olimpiya rezervleri stadionında ótkerilgen oyında respublikamızdıń bas komandası Samarqandtıń «Dinamo» klubına qarsı oyınǵa túsip, Superliga wákiline 0:4 esabında jeńilip qaldı.
Al, 6-fevral kúni «Aral» Tashkent qalasınıń «Paxtakor Farm» klubı menen oynap, óz qarsılasların 3:2 esabında jeńip shıǵıwǵa eristi. Ushırasıwdıń 15-minutında komandamız futbolshısı Semir Markisich «Paxtakor Farm» dárwazasın anıq nıshanǵa alıp, esaptı ashqan bolsa, 20-minutta tashkentli futbolshılar komandamız dárwazasına juwap golın urıwǵa miyasar boldı. Bunnan soń komandamız oyındaǵı ústinlikti óz qolına alıp, ushırasıwdıń 23 hám 55-minutlarında «Aral» klubınıń aǵzası Ruslan Anuarov «Paxtakor Farm» dárwazasın eki márte anıq nıshanǵa alıwǵa eristi.
Bul golǵa tashkentli futbolshılar komandamız dárwazasına 84-minutta juwap tobın jollap aradaǵı esaptı 3:2 ge jetkerdi hám ushırasıw usı esap penen juwmaqlandı.

Adilbay Orazov,
Qaraqalpaqstan xabar agentligi sholıwshısı.