Ózbekstanda 29-yanvardan baslap Hindstannan tiri haywanlar hám quslar, sonday-aq, Batıs Bengaliya shtatınan mámleketlik veterinariya qadaǵalawındaǵı barlıq haywanat ónimleriniń importı waqtınsha toqtatıldı.
Bul haqqında Veterinariya hám sharwashılıqtı rawajlandırıw komiteti xabar bermekte.
Bul qarar Jáhán haywanlar salamatlıǵın saqlaw shólkemi (WOAH) hám ashıq dereklerde járiyalanǵan maǵlıwmatlarǵa tiykarlanǵan. Hindstannıń Batıs Bengaliya shtatında Nipah virusınıń tarqalıwı sebepli qıyın epidemiologiyalıq jaǵday júzege kelgen.
Sol sebepli, Hindstannıń barlıq aymaǵınan tiri haywanlar hám quslardıń importı toqtatıldı. Batıs Bengaliya shtatınan mámleketlik veterinariya qadaǵalawı astındaǵı barlıq túrdegi tovarlar importı sheklendi (xalıqaralıq tranzitten tısqarı).
Sonıń menen birge, Hindstannıń barlıq aymaǵınan tiri haywan hám quslardıń importı sheklendi.
Maǵlıwmat ushın, Nipah virusı haywanlardan adamǵa juǵadı hám awır dem alıw jolları kesellikleri jáne ólimge alıp keletuǵın encefalitke sebep bolıwı múmkin.
Epizootiyalıq jaqtan qáwipsiz aymaqlardan ónimler alıp kiriw máselesi mámleketlik veterinariya xızmeti tárepinen ayrıqsha kórip shıǵıladı.
Esletip ótemiz, puqaralar Hindstan hám Qubla-Shıǵıs Aziyada Nipah virusınıń tarqalıwı sharayatında saqlıq ilajların kóriwge shaqırılǵan, qánigeler virustıń Ózbekstanǵa kirip keliw itimalı júdá tómen ekenligin atap ótken edi.

Sh.Mamaturopova, ÓzA