Bizge belgili, búgingi kúnde xalıq diplomatiyası Ózbekstannıń sırtqı siyasatın jáne de bayıtıp, sırt mámleketler menen óz-ara birge islesiw baylanıslarında áhmiyetli quralǵa aylanıp barmaqta.
Ǵárezsizlik jıllarında mámleketlik hám jámiyetlik ǵayratkerler, ilimpazlar, shayır hám jazıwshılar, kórkem óner ǵayratkerleri, ónermentler sıyaqlı jámiyetshilik wákilleriniń ámeliy is-háreketleri elimizdiń xalıqaralıq kólemde tanılıwı hám abırayınıń artıwına xızmet etpekte. Olardıń jumısına baylanıslı arxiv hújjetlerin úyreniw, tallaw úlken áhmiyetke iye.
Shanxay birge islesiw shólkemi Xalıq diplomatiyası orayı, Ózbekstan Respublikasınıń Milletleraralıq qatnasıqlar hám sırt eldegi watanlaslar máseleleri boyınsha komiteti hám “Ózarxiv” agentligi menen birgelikte “Xalıqaralıq birge islesiwge baylanıslı arxiv hújjetleri – xalıq diplomatiyası ushın áhmiyetli derek” atamasında dógerek sáwbeti shólkemlestirildi.
Ilaj xalıqaralıq birge islesiwge baylanıslı arxiv hújjetleriniń áhmiyeti hám xalıq diplomatiyasına qosatuǵın úlesi haqqındaǵı zárúr dodalawlardan ibarat boldı.
Dógerek sáwbetinde Dos qalalar alyansı, Ózbekstan tariyxı mámleketlik muzeyi, Ózbekstan Respublikası Ministrler Kabineti janındaǵı Repressiya qurbanları esteligi mámleketlik muzeyi, Áliysher Nawayı atındaǵı Ózbekstan Milliy kitapxanası, Ózbekstan Respublikası Ilimler akademiyası Tariyx institutı, Ózbekstan Milliy universiteti Tariyx fakulteti Derektanıw hám arxivtanıw kafedrası, Ózbekstan milliy arxivleri, tariyxshı ilimpazlar hám milliy mádeniy oraylardıń wákilleri qatnastı.
Ilajdıń áhmiyetli bólimlerinen biri arxiv materialları kórgizbesi bolıp, onda Ózbekstan kinofotofono hújjetleri milliy arxivi hám Ózbekstan milliy arxiviniń saqlawındaǵı xalıqaralıq baylanıslarǵa baylanıslı 40 tan aslam hújjet kórsetildi.
Qatnasıwshılar usı materiallar arqalı Ózbekstannıń xalıqaralıq baylanıslardaǵı ornı hám xalıq diplomatiyasınıń rawajlanıwın úyreniw imkaniyatına iye boldı.
Dógerek sáwbetinde bayanatlar arqalı xalıqaralıq baylanıslar, tariyxıy miyras hám xalıq diplomatiyasın rawajlandırıw boyınsha bir qatar jańa tallawlar usınıldı.
Sonıń ishinde, xalıq diplomatiyasınıń áhmiyeti, onnan paydalanıw usılları hám perspektivaları haqqında hár tárepleme sóz etildi.
Shanxay birge islesiw shólkemi Xalıq diplomatiyası orayınıń direktorı Q.Sobirov xalıqaralıq birge islesiwdegi zamanagóy tendenciyalar hám xalıq diplomatiyasınıń globallıq áhmiyeti haqqında pikir bildirdi.
“Ózarxiv” agentliginiń direktorı U.Yusupov arxiv isi hám arxiv materialları arqalı xalıq diplomatiyasın rawajlandırıw imkaniyatların málim etti.
– Ózbekstannıń mádeniy miyrasın qásterlep saqlaw hám dúnyaǵa keńnen úgit-násiyatlaw búgin oǵada áhmiyetli, – dedi Ózbekstan tariyxı mámleketlik muzeyiniń direktorı Jannat Ismoilova. – Eń úlken tariyxıy fotosúwretler biziń muzeyde bar. Sol sebepli úlken kórgizbe shólkemlestiriw usınısın bildirmekshimen. Sonıń menen birge, sırt eldegi muzeylerde de elimizdiń tariyxına baylanıslı kóplegen foto materiallar, arxiv hújjetleri bar. Olar menen birge islesiwdi keńirek jolǵa qoyıw áhmiyetli. Bıyıl Watanımız ǵárezsizliginiń 35 jıllıǵı keńnen belgilenedi. Búgin Ózbekstan jańa baslamalardı alǵa qoyıp atırǵan mámleket sıpatında dúnyaǵa tanılmaqta. Onda tiyisli shólkemler, sonday-aq, “Birlesken qalalar alyansı” strukturası menen birge islesiwdi kúsheytiw ayrıqsha áhmiyetke iye.
Dógerek sáwbeti juwmaǵında Shanxay birge islesiw shólkemi Xalıq diplomatiyası orayı hám Tashkent qalasındaǵı “Keleshek” orayı arasında birge islesiw memorandumına qol qoyıldı.

Nazokat Usmonova, Oybek Pardaev (foto), ÓzA