Usı jıldıń 5-7-fevral kúnleri Ózbekstan Respublikası Turizm komiteti hám mámleketimizde jumıs alıp barıp atırǵan turistlik kompaniyalardıń wákilleri birinshi márte Hindstan hám Aziyadaǵı eń iri turistlik kórgizbelerden biri – “OTM Mumbai”de qatnaspaqta.
Kórgizbe sheńberinde shólkemlestirilgen Ózbekstan milliy stendi miymanları mámleketimizdiń bay mádeniy miyrası, siyrek ushırasatuǵın turistlik baǵdarlar hám zamanagóy turistlik xızmetler menen jaqınnan tanısıw imkaniyatına iye bolmaqta.
“OTM Mumbai” kórgizbesi sheńberinde xalıqaralıq turoperatorlar, aviakompaniyalar, jetekshi media kompaniyalar hám investorlar menen B2B ushırasıwlar hám birge islesiw boyınsha sóylesiwler ótkerilmekte.
Sonday-aq, Ózbekstan turizm brendin úgit-násiyatlaw hám sırt el turistleriniń aǵımın arttırıwǵa qaratılǵan prezentaciyalar shólkemlestirilmekte.
Bul abıraylı kórgizbede qatnasıw Ózbekstan ushın Hindstan turistlik agentlikleri menen birge islesiwdi bekkemlew, perspektivalı sherikler hám investorlar menen tikkeley baylanıslar ornatıw, sonday-aq, mámlekettiń dem alıw hám sayaxat etiw ushın bar bolǵan siyrek ushırasatuǵın imkaniyatların keńnen kórsetiw imkaniyatın bermekte.
Maǵlıwmat ornında atap ótiw kerek, “OTM Mumbai” kórgizbesi hár jılı 50 den aslam mámleketten turizm sanaatı wákillerin bir jerge jıynap, tájiriybe almasıw, kelisimler dúziw hám jańa turistlik ónimlerdi usınıw ushın áhmiyetli xalıqaralıq platforma esaplanadı.
Ózbekstannıń bul ilajda qatnasıwı mámleketler arasındaǵı uzaq múddetli birge islesiw hám turistlik baylanıslardı keńeytiw perspektivaların ashadı.

Muhayyo Toshqoraeva, ÓzA