Усы жылдың 5-7-февраль күнлери Өзбекстан Республикасы Туризм комитети ҳәм мәмлекетимизде жумыс алып барып атырған туристлик компаниялардың ўәкиллери биринши мәрте Ҳиндстан ҳәм Азиядағы ең ири туристлик көргизбелерден бири – “OTM Mumbai”де қатнаспақта.

Көргизбе шеңберинде шөлкемлестирилген Өзбекстан миллий стенди мийманлары мәмлекетимиздиң бай мәдений мийрасы, сийрек ушырасатуғын туристлик бағдарлар ҳәм заманагөй туристлик хызметлер менен жақыннан танысыў имканиятына ийе болмақта.

“OTM Mumbai” көргизбеси шеңберинде халықаралық туроператорлар, авиакомпаниялар, жетекши медиа компаниялар ҳәм инвесторлар менен B2B ушырасыўлар ҳәм бирге ислесиў бойынша сөйлесиўлер өткерилмекте.

Сондай-ақ, Өзбекстан туризм брендин үгит-нәсиятлаў ҳәм сырт ел туристлериниң ағымын арттырыўға қаратылған презентациялар шөлкемлестирилмекте.

Бул абырайлы көргизбеде қатнасыў Өзбекстан ушын Ҳиндстан туристлик агентликлери менен бирге ислесиўди беккемлеў, перспективалы шериклер ҳәм инвесторлар менен тиккелей байланыслар орнатыў, сондай-ақ, мәмлекеттиң дем алыў ҳәм саяхат етиў ушын бар болған сийрек ушырасатуғын имканиятларын кеңнен көрсетиў имканиятын бермекте.

Мағлыўмат орнында атап өтиў керек, “OTM Mumbai” көргизбеси ҳәр жылы 50 ден аслам мәмлекеттен туризм санааты ўәкиллерин бир жерге жыйнап, тәжирийбе алмасыў, келисимлер дүзиў ҳәм жаңа туристлик өнимлерди усыныў ушын әҳмийетли халықаралық платформа есапланады.

Өзбекстанның бул илажда қатнасыўы мәмлекетлер арасындағы узақ мүддетли бирге ислесиў ҳәм туристлик байланысларды кеңейтиў перспективаларын ашады.

Муҳайё Тошқораева, ӨзА