Ózbekstan Respublikası Oliy Majlisi Senatınıń on úshinshi jalpı májilisi óz jumısın dawam ettirmekte.
Onda Senat hám Húkimet aǵzaları, ministrlikler hám uyımlardıń basshıları, ǵalaba xabar qurallarınıń wákilleri qatnaspaqta.
Senat Baslıǵı Tanzila Norboeva basqarıp atırǵan májilistiń keshe bolıp ótken birinshi jumıs kúninde azıq-awqat qáwipsizligin támiyinlew, xalıqtıń salamat turmıs tárizin qollap-quwatlaw, sporttı ǵalaba en jaydırıw, jeke maǵlıwmatlardı qorǵaw sistemasın bunnan bılay da jetilistiriwge qaratılǵan nızamlar maqullandı.
Ózbekstanda islam bankiniń jumısın engiziw, ekologiyalıq taza aymaqlardıń huqıqıy statusın belgilew, qorǵalatuǵın tábiyǵıy aymaqlar tarawındaǵı nızamshılıqtı jetilistiriw máseleleri kórip shıǵıldı.
Nızamshılıqqa kirgizilip atırǵan qosımshaǵa bola, húkimet aǵzalıǵına usınılǵan shaxslar hám hákim lawazımına talabanlar endi óz jumıs baǵdarlamaları menen bir qatarda korrupciyanıń aldın alıw boyınsha jeke rejelerin de usınıwı shárt etip belgilenbekte.
Jalpı májilistiń ekinshi jumıs kúninde Ózbekstan menen Vengriya arasında uslap beriw haqqındaǵı shártnamanı ratifikaciyalaw, 2030-jılǵa shekem gender teńlikke erisiw strategiyasın ámelge asırıw boyınsha belgilengen wazıypalar, sociallıq tarawǵa qánigelesken mámleketlik hám jeke menshik joqarı bilimlendiriw mákemeleriniń pitkeriwshileriniń bántligin támiyinlew ilajlarınıń orınlanıwı dodalanadı.
Ministrler Kabinetine aymaqlarda infrastrukturanı rawajlandırıw, qurılıs jumısların tártipke salıw, dárilik ósimliklerdi jetistiriw hám qayta islew, aliment óndiriw hám tólew sistemasın jetilistiriw boyınsha jiberilgen parlamentlik sorawlardıń nátiyjeleri kórip shıǵıladı.
Jalpı májilis sheńberinde Konstituciyalıq sud hám Joqarǵı sudtıń quramlarına ózgerisler kirgiziwge baylanıslı máseleler de dodalanıwı kútilmekte.

N.Abduraimova,
N.Haydarov (foto), ÓzA