Ózbekstan Respublikası Prezidentiniń 2025-jıl 8-sentyabrdegi “Mektepten tısqarı bilimlendiriw sistemasınıń jumısın túp-tiykarınan qayta kórip shıǵıw ilajları haqqında”ǵı qararı mektepten tısqarı bilimlendiriw shólkemleriniń jumısın túp-tiykarınan qayta kórip shıǵıwda, zamanagóy kózqaraslar tiykarında rawajlandırıw arqalı balalardıń bos waqıtların mazmunlı hám nátiyjeli shólkemlestiriwde, olardı intellektuallıq jaqtan jetik, Watanǵa sadıq, tariyxımız hám milliy mádeniyatımızǵa húrmet ruwxında tárbiyalawda hám oqıwshılardıń bos waqıtların mazmunlı shólkemlestiriwde oǵada áhmiyetli huqıqıy-hújjet bolıp tabıladı.
Usı hújjet tiykarında, mámleketimizde oqıwshılardı kásipke baǵdarlaw, salamat turmıs tárizin úgit-násiyatlaw, jas áwladtıń dóretiwshilik qábileti menen talantın rawajlandırıw hám jaslardıń tálim-tárbiyası ushın qosımsha kompleksli ilajlardı ózinde jámlegen bes baslama ámeliyatqa engizilmekte. Atap aytqanda, Prezident qararı boyınsha Qaraqalpaqstan Respublikasında 1 Respublikalıq hám 17 rayonlıq, qalalıq “Keleshek” orayları shólkemlestirilip, óz jumısların basladı.
Respublikamızdaǵı jańadan shólkemlestirilip atırǵan “Keleshek” oraylarınıń jumısın keń jámiyetshilikke tanıstırıw maqsetinde, Qaraqalpaqstan Respublikası Mektepke shekemgi hám mektep bilimlendiriwi ministrligi tárepinen Nókis qalasında jaylasqan Respublikalıq “Keleshek” orayında baspasóz ánjumanı bolıp ótti.
Ánjumanǵa ministrlik hám oraydıń basshıları, juwapker xızmetkerleri, ǵalaba xabar quralları wákilleri qatnastı.
Onda Qaraqalpaqstan Respublikası Mektepke shekemgi hám mektep bilimlendiriwi ministriniń orınbasarı Q.Ismaylov, respublikalıq “Keleshek” orayı direktorı R.Tashimov shıǵıp sóylep, sońǵı jılları Prezidentimizdiń arnawlı Párman hám qararları tiykarında respublikamızda ámelge asırılıp atırǵan iygilikli isler hám olardıń unamlı nátiyjeleri haqqında keń túrde aytıp berdi.
– Ásirese, Ózbekstan Respublikası Prezidentiniń 2025-jıl 8-sentyabrdegi PQ-277-sanlı qararı tiykarında, Qaraqalpaqstanda 1 Respublikalıq hám 17 rayonlıq, qalalıq “Keleshek” oraylarınıń shólkemlestiriliwi mektepke tayarlaw toparlarında balalarda bilim alıw, kommunikativlik hám dóretiwshilik kompetenciyalardı qáliplestiriw, oqıwshılardı Prezident, dóretiwshilik hám qánigelestirilgen bilimlendiriw shólkemlerine tayarlaw, talantlı jaslardı tańlap alıw sistemasın rawajlandırıw, olardı qollap-quwatlaw ushın zárúr sharayatlar jaratıw, ósip kiyatırǵan jas áwladtıń STEAM pánleri hám ilimge bolǵan umtılısların xoshametlew, intellektuallıq hám dóretiwshilik potencialın júzege shıǵarıw, oqıwshılardı jasalma intellekt hám robototexnika baǵdarlarına tartıw arqalı olardıń dóretiwshilik kónlikpelerin jáne de qáliplestiriw hám robototexnika, mobilografiya, programmalastırıw, SMM hám modellestiriw sıyaqlı dógereklerdi shólkemlestiriw, oqıwshılardıń shet tillerin úyreniwge bolǵan qızıǵıwshılıǵın arttırıw hám shet tillerin oqıtıwdıń zamanagóy usılları tiykarında dógereklerdiń jumısın jolǵa qoyıwda áhmiyetli xızmet atqarmaqta, – deydi Qaraqalpaqstan Respublikası “Keleshek” orayı direktorı Rashid Tashimov. – Usılar menen birge “Keleshek” oraylarında oqıwshılardıń ekologiyalıq bilimleri arttırılıp, ekologiyaǵa baylanıslı joybarlardı ámelge asırıwına, dóretiwshilik hám kórkemlik qábileti rawajlandırıw, olardıń olimpiada hám ǵalabalıq sport túrlerine qızıǵıwshılıǵın arttırıwǵa ámeliy járdemler kórsetilmekte.
Házirgi kúni respublikamız boyınsha “Keleshek” oraylarındaǵı 750 dógerekke 6 jastan 18 jasqa shekemgi 20296 oqıwshı tartılǵan bolıp, olarǵa jámi 774 pedagog kadrlar bilim berip kelmekte. “Keleshek” oraylarında sabaqlar zamanagóy pedagogikalıq qatnaslar tiykarında, maman qánigeler tárepinen alıp barıladı hám jaslardıń qızıǵıwshılıǵı hám individual imkaniyatları esapqa alınadı.
Ilajda jurnalistler Qaraqalpaqstan Respublikası “Keleshek” orayında shólkemlestirilgen dógereklerde bolıp, olardıń jumısları hám oqıwshılar tárepinen tayarlanǵan ónimler menen jaqınnan tanıstı.
-Bul orayda 1 jıldan beri oqıwshılarǵa kompyuter dizaynı hám grafikası baǵdarı boyınsha bilim berip atırman, – deydi oray muǵallimi Peruza Táńirbergenova. – Dógerekke eki toparda 20 oqıwshı qatnasadı. Olardıń bilim alıwǵa degen ıqlası joqarı. Sonlıqtan olar men úyretken baǵdarlamalardı tez meńgerip ketpekte.
– Inglis tili boyınsha bilim beretuǵın shet tiller dógereginde 4 toparda 40 oqıwshıǵa tálim bermektemen, – deydi Gúlparshın Ismailova. – Dógereklerdegi sabaqlar kestesi oqıwshılardıń mektepten bos waqıtlarına qaray eki mezgilde dúzilgen. Ata-analardıń tólem pulı da onsha qımbat emes. Prezidentimizdiń arnawlı qararı tiykarında, respublikamız oqıwshıları ushın bazalıq esaplaw muǵdarınıń 15 procenti, yaǵnıy, házir 61 mıń 800 sum etip belgilengen. Bunıń ushın húrmetli Jurtbasshımızǵa úlken raxmetler aytamız.
“Keleshek” orayınıń jumısları menen tanısar ekenbiz, olardıń jas áwladtı zaman talaplarına sáykes bilim hám kónlikpeler menen támiyinlew, olardıń sociallıq belsendiligin arttırıw hám keleshekte básekige shıdamlı kadrlar sıpatında qáliplesiwi ushın xızmet etetuǵın dárgaylar bolatuǵın isenimimiz arttı.

Adilbay Orazov,
Qaraqalpaqstan xabar agentligi sholıwshısı.
M. Xabibullaevtıń túsirgen súwretleri