Jınayat isleri boyınsha Kegeyli rayonı sudınıń baslıǵı R.Bekmuratova tárepinen ótkerilgen kóshpeli ashıq sud májilisinde Kegeyli rayonı Ishki isler bólimi baslıǵınıń usınısı tiykarında jınayat islegeni ushın belgilengen tártipte jaza ótep atırǵan, óz qılmısınan shın kewilden pushayman bolıp, jámiyetlik turmısqa qayta beyimlesiw jolına isenimli qádem qoyǵan 5 shaxstıń is materialları hár tárepleme úyrenip shıǵıldı.
Onda Probaciya xızmeti tárepinen usınılǵan maǵlıwmatlar hám sudlanǵan shaxslardıń minez-qulqı menen jámiyetlik islerge belsendiligi inabatqa alındı.
Dodalawlar juwmaǵında, sud tárepinen bul shaxslardıń dúzeliw jolına túskeni, nızam talaplarına ámel etip atırǵanı hám qaytadan jınayat islemewine isenim bar ekenligi inabatqa alınıp, olardı múddetinen aldın shártli túrde jazanı ótewden azat etiw boyınsha qarar qabıl etildi.
Bul kóshpeli ashıq sud májilisi jazanı orınlawda adamgershilik, ádillik hám nızam ústinligi principlerine ámel etken halda, jınayat islegen shaxslardı jámiyetke qayta beyimlestiriwge qaratılǵanlıǵı menen oǵada áhmiyetli boldı.

Qaraqalpaqstan xabar agentligi