Búgin, 2026-jıl 5-fevral kúni Ózbekstan Respublikası Oliy Majlisi Senatınıń on úshinshi jalpı májilisi óz jumısın basladı.
Onda Senat hám Húkimet aǵzaları, ministrlikler hám uyımlardıń basshıları, ǵalaba xabar qurallarınıń wákilleri qatnaspaqta.
Senat Baslıǵı Tanzila Norboeva basqarıp atırǵan májilis kún tártibine mámleketti sociallıq-ekonomikalıq rawajlandırıw, ámeldegi nızamshılıqtı jetilistiriw, puqaralardıń huqıqları menen erkinliklerin qorǵawǵa baylanıslı bir qatar máseleler kirgizilgen.
Sonıń ishinde, Prezidentimiz Shavkat Mirziyoevtiń Oliy Majlis hám Ózbekstan xalqına Múrájatınan kelip shıǵatuǵın tiykarǵı wazıypalar belgilep alınadı hám Senattıń 2025-jıldaǵı jumısına juwmaq shıǵarıladı.
Senatorlar azıq-awqat qáwipsizligin támiyinlew, xalıqtıń salamat turmıs tárizin qollap-quwatlaw, sporttı ǵalaba en jaydırıw, jeke maǵlıwmatlardı qorǵaw sistemasın bunnan bılay da jetilistiriwge qaratılǵan nızamlardı kórip shıǵadı.
Ózbekstanda islam bankiniń jumısın engiziwge baylanıslı nızam hújjetlerine ózgerisler hám qosımshalar kirgiziw, ekologiyalıq taza aymaqlardıń huqıqıy statusın belgilew, qorǵalatuǵın tábiyǵıy aymaqlar tarawındaǵı nızamshılıqtı jetilistiriw máseleleri kún tártibinen orın alǵan.
Jalpı májiliste Ózbekstan menen Vengriya arasında uslap beriw haqqındaǵı shártnamanı ratifikaciyalaw, 2030-jılǵa shekem gender teńlikke erisiw strategiyasın ámelge asırıw boyınsha belgilengen wazıypalar, sociallıq tarawǵa qánigelesken mámleketlik hám jeke menshik joqarı bilimlendiriw mákemeleriniń pitkeriwshileriniń bántligin támiyinlew ilajlarınıń orınlanıwın dodalaw rejelestirilgen.
Ministrler Kabinetine aymaqlarda infrastrukturanı rawajlandırıw, qurılıs jumısların tártipke salıw, dárilik ósimliklerdi jetistiriw hám qayta islew, aliment óndiriw hám tólew sistemasın jetilistiriw boyınsha jiberilgen parlamentlik sorawlardıń nátiyjeleri kórip shıǵıladı.
Jalpı májilis sheńberinde senatorlar Konstituciyalıq sud hám Joqarǵı sud quramlarına ózgerisler kirgiziw máselelerin de dodalaydı.
Májiliste kórip shıǵılatuǵın barlıq máseleler haqqında tolıq sáwlelendirip baramız. Bizdi baqlap barıń!

N.Abduraimova,
F.Abdurasulov (suwret), ÓzA