Arqa-batıs áskeriy okrugine qaraslı áskeriy bólimde internet hám sociallıq tarmaqlarda milliy armiyamız haqqında tarqatılıp atırǵan jalǵan, dálillenbegen hám dóhmet kórinisindegi xabarlardıń aldın alıw hám áskeriy xızmetkerlerdiń huqıqıy bilimlerin arttırıwǵa qaratılǵan úgit-násiyat ilajı bolıp ótti.
Ózbekstan Respublikası Qorǵanıw ministrligi janındaǵı Jámiyetlik keńestiń Qaraqalpaqstan Respublikası aymaqlıq bólimi hám Ózbekstan Jurnalistler awqamı Qaraqalpaqstan bólimi menen birgelikte shólkemlestirilgen ilajǵa Jınayat isleri boyınsha Nókis qalası sudınıń sudyası Azamat Shınıbekov ta qatnasıp, qánigelerdiń sociallıq tarmaqlar arqalı tiykarsız hám jalǵan málimleme tarqatıwdıń unamsız aqıbetleri hám bunday háreketler ushın nızamshılıqta belgilengen juwapkershilik haqqında keń túrde sóz etti.
Atap ótilgenindey, búgingi kúnde málimleme texnologiyaları jámiyetlik turmıstıń ajıralmas bólegine aylanǵan. Internet hám sociallıq tarmaqlar arqalı málimleme alıw imkaniyatları keńeygen bir waqıtta, tilekke qarsı, jalǵan hám tiykarsız xabarlar da tez pát penen tarqalmaqta. Bunday málimlemeler tek ǵana ayırım shaxslardıń abırayına emes, al sociallıq turaqlılıqqa da úlken qáwip salıwı múmkin. Sonıń menen birge, sudya Azamat Shınıbekov kiberjınayatlarǵa qarsı gúresiwde sud organlarınıń roli ayrıqsha ekeni atap ótip, sudlar tek ǵana jaza tayınlaw menen sheklenip qalmastan, xalıqtıń huqıqıy sanasın arttırıw, kiberqáwipsizlik tarawında xabardarlıqtı kúsheytiwge de xızmet etetuǵınına itibar qarattı. Sud ámeliyatındaǵı mısallar tiykarında jalǵan málimleme tarqatıw arqalı shaxslar hám shólkemlerge úlken ruwxıy hám materiallıq zıyan jetkerilip atırǵanı aytıldı. Sonlıqtan, hár bir internet paydalanıwshısı tarqatıp atırǵan málimlemesiniń haqıyqatlıǵına juwapkershilik penen qatnas jasawı, nızam sheńberinde háreket etiwi kerek ekenligi atap ótildi.
Bunnan tısqarı, milliy armiyamız haqqında dálillenbegen hám jalǵan málimlemelerdi tarqatıw mámleketlik hám jámiyetlik qáwipsizlikke úlken qáwip salıwı hám áskeriy turaqlılıqqa unamsız tásir kórsetiwi múmkin. Sonlıqtan málimleme tarqatıwǵa baylanıslı nızamsız háreketler Ózbekstan nızamshılıǵında jınayat sıpatında belgilengen.
Ilaj sońında qatnasıwshılar ózlerin qızıqtırǵan sorawlarına qánigelerden hár tárepleme juwap aldı.

Qaraqalpaqstan xabar agentligi