Jınayat isleri boyınsha Beruniy rayonı sudınıń baslıǵı R.Kamalova tárepinen Altınsay awıl puqaralar jıyını turǵınları ushın kóshpeli qabıllaw shólkemlestirildi. Bul qabıllawdan gózlengen tiykarǵı maqset – puqaralardıń sud-huqıq tarawına baylanıslı múrájatların tikkeley tıńlaw, olarǵa nızamshılıq sheńberinde ámeliy hám huqıqıy túsinikler beriwden ibarat.
Kóshpeli qabıllaw dawamında puqaralar tárepinen túrli máseleler boyınsha múrájatlar bildirildi. Atap aytqanda, aliment óndiriw tártibi, sud tárepinen tayınlanǵan jazanı jeńiliregi menen almastırıw, kadastr hújjetlerin rásmiylestiriw hám jer uchastkaların nızamsız ózlestiriwdiń huqıqıy aqıbetleri menen baylanıslı máseleler boyınsha kóplegen múrájatlar boldı.
Múrájatlardı kórip shıǵıw procesinde sud baslıǵı tárepinen puqaralarǵa hár bir máseleniń nızamshılıq tiykarları tolıq túsindirildi. Ásirese, sudqa baylanıslı máselelerdiń belgilengen múddetlerde hám tiyisli sud instanciyalarında kórip shıǵıw zárúrligi hám múrájatlar boyınsha sud dodalawına aralasıw múmkin emes ekenligi boyınsha puqaralarǵa huqıqıy túsinikler berildi.
Sonday-aq, kóshpeli qabıllaw dawamında puqaralardıń múrájatların kórip shıǵıwdıń huqıqıy tártibi, sud islerin júrgiziwde nızamlılıq hám qalıslıq principlerine qatań ámel etiliwi, sonday-aq, korrupciyalıq jınayatlardıń aldın alıw, olarǵa mawasasız múnásibetti qáliplestiriw máseleleri boyınsha da huqıqıy úgit-násiyat jumısları alıp barıldı.
Bunday kóshpeli qabıllawlar xalıqtıń huqıqıy sanası hám mádeniyatın arttırıw, sud organları jumısınıń ashıq-aydınlıǵın támiyinlew hám puqaralardıń sudlarǵa bolǵan isenimin jáne de bekkemlewge xızmet etedi.

Qaraqalpaqstan xabar agentligi