Jaslar arasında ǵalabalıq futboldı rawajlandırıw, salamat turmıs tárizin qáliplestiriw, zıyanlı illetlerden saqlaw, huqıqbuzarlıq hám basqa da jat illetlerge qarsı gúresiw, doslıq qatnasıqtı ornatıw hám bekkemlew, olardıń sheberligin arttırıw hám qábiletli futbolshılardı tańlap alıw maqsetinde, Nókis qalasında oqıwshı qızlar arasında futbol boyınsha tuńǵısh márte ótkerilip atırǵan «Mektepke shekemgi hám mektep bilimlendiriwi ministri kubogi» niń qalalıq basqıshı bolıp ótti.
Kubok jarısına paytaxtımızdan jaylasqan 37 ulıwma orta bilim beriw mekteplerinen komandalar qatnasıp, jeńimpazlıq ushın óz-ara bellesti.
Keskin ótken oyınlar juwmaǵında, birinshi orındı 40-sanlı ulıwma orta bilim beriw mektebi jeńip alıp, kubok jarısınıń respublikalıq basqıshına jollamanı qolǵa kirgizdi.
Sıylı ekinshi hám úshinshi orınlar bolsa, 39-sanlı hám 12-sanlı ulıwma orta bilim beriw mektepleriniń komandaları jeńip alıwǵa miyasar boldı.
Jarıs sońında jeńimpazlar shólkemlestiriwshiler tárepinen tayarlanǵan arnawlı kubok, medal hám diplomlar menen sıylıqlandı.

Adilbay Orazov,
Qaraqalpaqstan xabar agentligi sholıwshısı.