Ózbekstan Respublikası Prezidenti Administraciyası janındaǵı Bilimlendiriwdiń sapasın támiyinlew milliy agentligi xızmetkerleri hám joqarı bilimlendiriw shólkemleriniń bilimlendiriwdiń sapasın arttırıw bólimi baslıqları ushın “Sapanı támiyinlew principleri” temasında eki kúnlik qánigeligin arttırıw shınıǵıwları bolıp ótti.
Oqıwlar Ullı Britaniyanıń Quality Assurance Agency (QAA) hám British Council shólkemleriniń maman ekspertleri menen birgelikte shólkemlestirildi.
Joqarı bilimlendiriwde sapanı támiyinlewdiń xalıqaralıq principleri boyınsha bekkem teoriyalıq hám ámeliy tiykar jaratıw maqsetinde shólkemlestirilgen ilajda qatnasıwshılar ishki hám sırtqı sapanı támiyinlew sistemaları, bahalaw processlerinde dálillerge tiykarlanǵan qatnaslar, mápdar tárepler menen islesiw hám maǵlıwmatlarǵa tiykarlanǵan qararlar qabıl etiw máselelerin tereń úyrendi.
Baǵdarlama interaktiv ámeliy sabaqlar, topar dodalawları hám keys-analizler tiykarında alıp barılıp, qatnasıwshılar Evropa standartları hám instrukciyaları (ESG) hám Ózbekstanda qáliplesip atırǵan sapa standartları arasındaǵı sáykeslik hám ayırmashılıqlardı tallaw imkaniyatına ie boldı.
Sonday-aq, sırtqı bahalaw processleri, bahalaw normaları hám reyting quralların islep shıǵıw, esabatlardı qalıs hám dálillerge súyengen halda tayarlaw boyınsha ámeliy kónlikpeler bekkemlendi.
Shınıǵıwlar dawamında sapanı támiyinlew procesinde hadallıq hám ashıq-aydınlıq, mápler soqlıǵısıwınıń aldın alıw, sonday-aq, maǵlıwmatlardıń qáwipsizligi hám jekeligin támiyinlew sıyaqlı principlerge itibar qaratıldı.
Sonıń menen birge, studentler, jumıs beriwshiler hám basqa da mápdar táreplerdi sapanı támiyinlew processlerine tartıw hám olar menen nátiyjeli pikirlesiw alıp barıw boyınsha ámeliy sabaqlar shólkemlestirildi.
Barlıq sessiyalarǵa tolıq qatnasqan tıńlawshılarǵa sertifikat tapsırıldı.

Gulnoza Boboeva, Wktam Hayitov (foto), ÓzA