«MUNIS» – «Ózbekstan milliy innovaciyalıq sistemasın modernizaciyalaw» joybarı ilim, texnologiya hám innovaciyalar tarawın túp-tiykarınan jańalawǵa qaratılǵan áhmiyetli baslama bolıp esaplanadı. Joybar sheńberinde ilimiy izertlewlerdiń sapasın arttırıw, innovaciyalıq infrastrukturanı rawajlandırıw hám ilimiy qollanbalardı ámeliyatqa engiziw boyınsha sistemalı jumıslar alıp barılmaqta.
Ózbekstan Respublikası Joqarı bilimlendiriw, ilim hám innovaciyalar ministrliginde Jáhán banki wákilleri menen «MUNIS» joybarın ámelge asırıw nátiyjeleri hám onıń ekinshi basqıshın iske qosıw perspektivaları dodalandı. Ushırasıwda joqarı bilimlendiriw, ilim hám innovaciyalar ministriniń orınbasarı Wktam Salomov, Jáhán banki ekspertleri Eralı Beksultan, Anna Ubaydullaeva hám Gáwhar Ospanova, sonday-aq, «MUNIS» joybarın ámelge asırıw toparınıń basshısı Dilshod Azgarov qatnastı.
Sóylesiw dawamında milliy innovaciyalıq ekosistemanı bekkemlew, ilimiy-izertlew infrastrukturasın rawajlandırıw, ilimiy shólkemlerdiń potencialın arttırıw hám ilimiy jumıs nátiyjelerin kommerciyalastırıwǵa qaratılǵan «MUNIS» joybarınıń tiykarǵı jetiskenlikleri dodalandı. Sonday-aq, joybardı ámelge asırıwdıń institucionallıq hám shólkemlestiriwshilik tárepleri, tiykarǵı mápdar tárepler menen nátiyjeli birge islesiw tájiriybesine ayrıqsha itibar qaratıldı.
Bunnan tısqarı, ilim, texnologiya hám innovaciyalar tarawındaǵı reformalardı jáne de jedellestiriw, ilimiy hám innovaciyalıq baslamalardı qollap-quwatlaw mexanizmlerin keńeytiw, jeke menshik sektor hám xalıqaralıq birge islesiwdiń rolin kúsheytiwge qaratılǵan «MUNIS» joybarınıń ekinshi basqıshınıń tiykarǵı baǵdarları boyınsha pikir alısıldı.

Muhayyo Toshqoraeva, ÓzA