Liviya ǵalaba xabar quralları mámlekettiń marhum jetekshisi Muammar Kaddafidiń balası, Sayf al-Islam Kaddafi tórt qurallı shaxs tárepinen óltirilgenin tastıyıqladı. Sayf Kaddafidiń siyasiy keńesgóyi Abdulla Usmon Facebook betindegi qısqa xabarında ólimshilik júz bergenin tastıyıqladı, biraq hádiysege baylanıslı tolıq maǵlıwmat bermedi.
Al Hadath telekanalı Kaddafi shańaraǵına jaqın adamlar bergen maǵlıwmatlarǵa súyenip, Sayf al-Islam óz rezidenciyasına jaqın jerdegi baǵda ólimshi jaraqat alǵanın tastıyıqladı. Hújimshiler sanı tórtew bolıp, olardıń barlıǵı waqıya ornınan tez qashıp ketken. Al Jazeera telekanalı bolsa qastıyanlıqtan aldın Kaddafidiń úyindegi barlıq videobaqlaw kameraları isten shıǵarılǵanın málim etti.
1972-jılı tuwılǵan Seyf al-Islam Liviyanı uzaq jıllar basqarǵan Muammar Kaddafidiń ekinshi balası edi. Ol London ekonomika mektebinde doktorlıq dárejesin alǵan hám Kaddafiy rejiminde reformator sıpatında tanılǵan. Ákesi Muammar Kaddafi 2011 jılı NATO qollap-quwatlaǵan xalıq kóterilisi nátiyjesinde hákimiyattan awdarılǵan hám keyin ala puqaralıq urısına aylanǵan sawashlar waqtında óltirilgen.
2011-jılı Franciya húkimeti Liviya oppoziciyasın rásmiy tán alǵannan keyin, Sayf al-Islam Euronews telekanalına intervyu berdi. Ol sáwbetlesiw waqtında Franciya prezidenti Nikolya Sarkoziden Liviya tárepinen saylaw kampaniyasın qarjılandırıw ushın berilgen pullardı qaytarıwdı talap etken edi.
Sayf al-Islam 2011-jıldıń aqırında Nigerge qashıwǵa urınıp, Liviyanıń batısındaǵı Zintan qalasında kóterilisshiler tárepinen qolǵa alınǵan. Ol 2017-jıl iyun ayında bosatılǵan hám sonnan berli Zintanda jasap atırǵan edi.

ÓzA