Arqa-batıs áskeriy okruginiń Ruwxıylıq hám aǵartıwshılıq orayında ullı oyshıl, ǵázel mulkinin sultanı Mir Áliysher Nawayı tuwılǵan kúniniń 585 jıllıǵı múnásibeti menen Nókis garnizonında xızmet etip atırǵan áskeriy xızmetkerler hám Nókis innovaciyalıq texnologiyalar universiteti studentleriniń qatnasıwında “Zakovat” intellektuallıq oyını shólkemlestirildi.
Ilajda shıǵıp sóylegenler Áliysher Nawayınıń ózbek ádebiyatı, til bilimi hám ulıwma jáhán mádeniyatınıń rawajlanıwındaǵı ornı haqqında hár tárepleme sóz etti. Onıń shıǵarmalarında adamgershilik, ádillik, watansúyiwshilik, ilim-aǵartıwshılıqqa umtılıw sıyaqlı joqarı ideyalar jámlengeni atap ótildi.
“Zakovat” intellektuallıq oyını jaslar hám áskeriy xızmetkerler arasında milliy ádebiyatımızǵa, atap aytqanda, shayır dóretiwshiligine bolǵan qızıǵıwshılıqtı jáne de arttırıw, olardıń intellektuallıq potencialın joqarılatıw, ruwxıy kózqarasın bayıtıw hám bos waqıtların mazmunlı shólkemlestiriwden ibarat boldı.
Intellektuallıq bellesiwde qatnasıwshılar bir neshe komandalarǵa bólingen halda Áliysher Nawayınıń ómiri hám dóretiwshiligi, onıń shıǵarmaları, tariyxıy shaxslar, milliy qádiriyatlar hám ulıwma bilimlerdi qamtıp alǵan sorawlarǵa juwap berdi. Oyın dawamında qatnasıwshılardıń bilim dárejesi, operativ pikirlew qábileti hám topar bolıp islew kónlikpeleri hár tárepleme sınaqtan ótkerildi.
Ilaj juwmaǵında eń joqarı nátiyjelerge erisken komandalar shólkemlestiriwshiler tárepinen diplom hám estelik sawǵaları menen sıylıqlandı.

Qaraqalpaqstan xabar agentligi