Kegeyli rayonın sociallıq-ekonomikalıq jaqtan rawajlandırıw, xalıqtıń bántligin támiyinlew, mámleketlik baǵdarlamalar sheńberindegi belgilengen wazıypalardıń orınlanıw barısı menen tanısıw hám aymaq belsendileri menen ushırasıw maqsetinde, Qaraqalpaqstan Respublikası Joqarǵı Keńesiniń Baslıǵı Amanbay Orınbaev usı rayonda boldı.
Eń dáslep respublikamız basshısı Júzimbaǵ awıl puqaralar jıyını aymaǵında 5 gektar maydanda Bántlikke kómeklesiw fondı qarjıları esabınan jańadan qurılıp atırǵan «KEGEYLI GREEN HOUSE» ıssıxananıń qurılıs jumısları menen tanıstı.
Bunnan soń Baxıtlı mákan puqaralar jıyını aymaǵındaǵı jaslardı shet tillerge oqıtıw hám jańadan shólkemlestirilgen «IT – Oray»ınıń jumısların, Xalqabad posyolkasındaǵı emlewxanada xalqımız ushın jaratılǵan sharayatlardı kózden ótkerdi.
Tanısıw barısında Iyshan qala mákan puqaralar jıyını aymaǵındaǵı kishi sanaat zonasında ámelge asırılıwı belgilengen joybarlardıń barısı da kórip shıǵılıp, juwapkerlerge isbilermenlerdi qollap-quwatlaw boyınsha anıq tapsırmalar berildi.
Sonday-aq, Joqarǵı Keńes Baslıǵı xalıq ushın mádeniy dem alıw orınların shólkemlestiriw baǵdarında Jilwan jap MPJ aymaǵında «Zarbdor tájiriybesi» tiykarında kanal boyında dem alıw ornı hám Nurlı bostan elatı aymaǵında dem alıw ornı hám jańa xızmet kórsetiwshi subektlerdi shólkemlestiriw joybarları menen jaqınnan tanıstı.
Usılar menen bir qatarda, rayonda ámelge asırılıp atırǵan qurılıs jumısları, atap aytqanda, «Jańa Ózbekstan» massivindegi kóp qabatlı jaylardı qurıw, Xalqabad posyolkasındaǵı kóp qabatlı jaylar ushın kanalizaciya tarmaqların qurıw jumısları kórip shıǵılıp, qurılıs jumısların óz waqtında, sapalı etip pitkeriw boyınsha juwapkerlerge anıq tapsırmalar berdi.
Bunnan soń, máhállelerdegi infrastruktura menen baylanıslı mashqalalardı sheshiw baǵdarında hár birine 3 mlrd sumnan ajıratılǵan Jańabazar hám Abat awıl puqaralar jıyınları puqaraları menen ushırasıp, ajıratılǵan qarjılardı óz ornında paydalanıwın qadaǵalawda máhálleniń nuranıy aqsaqalları, jası úlkenleri belsene qatnasıwı kerek ekenligi atap ótildi.
Sońınan Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵında rayondı sociallıq-ekonomikalıq jaqtan rawajlandırıw, xalıqtıń bántligin támiyinlew, mámleketlik baǵdarlamalar sheńberindegi belgilengen wazıypalar, ámelge asırılıwı tiyis ilajlar hám bunnan aldınǵı májiliste berilgen tapsırmalardıń orınlanıwına arnalǵan jıynalıs bolıp ótti.
Májiliste dáslep, burın belgilep berilgen tapsırmalardıń búgingi kúnde orınlanıwı, máhállelerdi abat etiw, infrastruktura menen baylanıslı mashqalalardı sheshiw, mámleketlik baǵdarlamalar sheńberinde joybarlardıń ámelge asırılıwı, puqaralardıń turmıs dárejesin jaqsılaw boyınsha wazıypalardıń orınlanıwı máseleleri sın kózqarasta kórip shıǵıldı. Sonıń menen birge, puqaralardıń qosımsha dáramat alıwına kómeklesiw, kámbaǵallıqtı qısqartıw, jańa kárxanalardıń jumısların shólkemlestiriw, kóp qabatlı úylerdi qurıw, qayta tikleniwshi energiya dereklerin keńnen en jaydırıw, isbilermenlikti rawajlandırıw boyınsha da tapsırmalardıń orınlanıwı máseleleri de talqılandı.
Májiliste bul jumıslardı ámelge asırıwda ayırım juwapkerlerdiń óz wazıypasına nemquraydılıq penen qarap atırǵanı sınǵa alınıp, jol qoyılıp atırǵan qáte-kemshilikler atap ótildi.
Bunnan tısqarı, óz wazıypasın atqarıwda qáte-kemshiliklerge jol qoyǵan ayırım juwapkerlerge intizamiy jaza sharasın qollaw, zárúr bolsa, lawazımına ılayıqlıǵı máselesin kórip shıǵıw boyınsha tapsırmalar berildi.

Qaraqalpaqstan xabar agentligi