“Tuqımgershilikti rawajlandırıw orayı” Qaraqalpaqstan Respublikası basqarmasınıń maǵlıwmatlarına qaraǵanda, 2025-jıldan baslap jańa sistema boyınsha tuqımlıq ǵálle maydanlarında ótkerilgen aprobaciya ilajları «E-urugʻ» elektron platforması arqalı ámelge asırılmaqta.

– 2026-jıldıń zúráátinen tuqımlıq dán jetistiriw maqsetinde rayonlarda awıl xojalıǵı subektleri arasında «E-urugʻ» platforması arqalı tańlawlar ótkerildi, – deydi “Tuqımgershilikti rawajlandırıw orayı” Qaraqalpaqstan Respublikası basqarması bas qánigesi Berdibek Naubeev.
Oǵan 123 subekt arza tapsırıp, sonnan 119 subekttiń 4639 gektar jeri tuqımlıq ǵálle jetistiriw ushın tańlap alındı. Ótkerilgen tańlaw nátiyjeleri boyınsha jeńimpaz dep tabılǵan 119 tuqımgershilik subekti tárepinen 4639 gektar maydanǵa tuqımlıq ǵálle egilip, búgingi kúnde tárbiyalaw jumısları alıp barılmaqta.
Ótken jıldıń dekabr ayında tuqımlıq biyday egilgen maydanlarda onıń rawajlanıw fazaları hám alıp barılıp atırǵan agrotexnikalıq ilajlardıń barısı boyınsha 1-monitoring ilajlar ótkerildi. 2026-jıldıń 25-yanvarınan 25-fevral sáneleri aralıǵında tuqımlıq biyday egilgen atızlarda 2-monitoring ilajları ótkeriledi.
Monitoring jumısları nátiyjesinde tuqımgershilik subektleri tárepinen egilgen tuqımlıq biydaylardıń rawajlanıw jaǵdayları úyrenilip, anıqlanǵan kemshiliklerdi saplastırıw ilajları, ayırım biyday atızların tuqımlıq biyday statusınan shıǵarıw ilajları ámelge asırıldı. Házirgi waqıtta ekinshi monitoring ilajları ótkerilmekte.

Á.Jiyemuratov,
Qaraqalpaqstan xabar agentligi.